ពលករខ្មែរនៅប្រទេសអារ៉ាប៊ីសាអូឌីតចំនួន ២៤នាក់ដែលរងការរំលោភបំពានសិទ្ធិបានត្រឡប់មកដល់ប្រទេសកម្ពុជាហើយ​​​នៅថ្ងៃទី​១២ឧសភានេះ។ ពលករខ្មែរ​ទាំងនេះគឺ​ស្ថិតនៅក្នុងចំណោមពលករ​ជាច្រើននាក់ផ្សេងទៀត​ ដែលស្នើអន្តរាគមន៍​​វិល​មកប្រទេស​​កម្ពុជាវិញ ក្រោមហេតុផល​រងការបំពានសិទ្ធិធ្ងន់ធ្ងរ​ពីថៅកែបរទេស។ ទន្ទឹមនឹងការត្រលប់មក​មាតុប្រទេសរបស់ពលករ​រងគ្រោះ​ ក្រសួងការងារកម្ពុជាក៏បានបញ្ជាក់ពីចំណាត់ការផ្លូវច្បាប់ទៅលើក្រុមហ៊ុនបញ្ជូនពលករ​ទៅអារ៉ាប៊ីសាអូឌីតដែល​រំលោភលក្ខខណ្ឌការងារ​ផងដែរ។

អ្នកនាំពាក្យក្រសួងការងារ លោក កត្តា អ៊ន បានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី​១២ឧសភានេះថា ក្រសួងការងារ​នឹង​​ចាត់ការតាមផ្លូវច្បាប់​​ទៅលើក្រុមហ៊ុន​បញ្ជូន​និងទទួលពលករពីប្រទេសកម្ពុជាទៅ​អារ៉ាប៊ីសាអូឌីតណា ដែលរកឃើញថាបាន​រំលោភបំពាន​លក្ខខណ្ឌ​ការងារ។ តាម​លោក កត្តា អ៊ន ក្រសួងការងារ​កំពុងស៊ើបអង្កេត​យ៉ាងល្អិតល្អន់ក្នុងសំណុំ​រឿងនេះ និងថា​ប្រសិនបើ​​រកឃើញមានការប្រព្រឹត្តិខុសនឹងច្បាប់មែន ក្រសួងការងារនឹងលុបអាជ្ញាប័ណ្ណ​ក្រុមហ៊ុននោះចោល​ ជាមួយការផាកពិន័យជាទឹក​ប្រាក់​​។​ នេះនៅពុំទាន់រាប់បញ្ចូល​ចំណាត់ការផ្លូវច្បាប់ផ្នែក​​​ព្រហ្មទណ្ឌនៅឡើយទេ។

តាមការចុះផ្សាយរបស់សារព័ត៌មានមួយចំនួន ពលករខ្មែរទាំង២៤នាក់នេះគឺជាពលករស្របច្បាប់​ដែលបានបញ្ជូន​ទៅធ្វើការនៅអារ៉ាប៊ីសាអូឌីតដោយក្រុមហ៊ុនឈ្មោះថា ហ្វាទីណា។ ក្រុមហ៊ុន ហ្វាទីណានេះ កាលពីថ្ងៃទី​៥ឧសភាកន្លងទៅបានធានាអះអាង​ថានឹងសម្របសម្រួលកិច្ច​អន្តាគមន៍ជួយដល់ពលករខ្មែរនៅប្រទេសអារ៉ាប៊ីសាអូឌីតណាដែលមានបំណងចង់វិលត្រឡប់មកប្រទេស​កម្ពុជាវិញ ដោយសុវត្ថិភាព​និងស្របតាមច្បាប់​។

គួររម្លឹកថា ក្រុមពលករខ្មែរ​នៅអារ៉ាប៊ីសាអ៊ូឌីត​​មួយក្រុម​​បានស្រែករកជំនួយ​អន្តរាគមន៍​តាមបណ្តាញសង្គម​កាលពីអំឡុងខែមេសាកន្លងទៅថ្មីនេះ ដោយអះអាង​ថា ​ពួកគេកំពុង​​រងការបង្ខាំងធ្វើបាប និងបង្អត់អាហារពីថៅកែ​។ ក្រុមពលករអះអាងទៀត​​ថា មុនដាក់ពាក្យមកធ្វើការ​ ក្រុមហ៊ុនហ្វាទីណាបញ្ជាក់ថា ពួកគេនឹងទទួលប្រាក់ខែ​​៤០០ដុល្លារ និងធ្វើការ ៨ម៉ោងក្នុងមួយថ្ងៃ ក៏ប៉ុន្តែ​តាមពិតជាក់ស្តែង ​​ពួកគេត្រូវធ្វើការច្រើនលើសម៉ោងដែលកំណត់។ អ្នកខ្លះ​ធ្វើ ១៨ម៉ោងក្នុងមួយថ្ងៃ និងអ្នកខ្លះធ្វើការរហូតដល់ទៅ ២២ម៉ោង។ នេះបើតាមក្រុម​ពលករខ្មែរនៅអារ៉ាប៊ីសាអូឌីត។

គួរជម្រាបថា ពលករខ្មែរ​ធ្វើការនៅអារ៉ាប៊ីសាអូឌីមាន​សរុប ១៣៣នាក់ ក្នុងនោះ ១១៤នាក់បានស្នើសុំត្រលប់មកស្រុក​ខ្មែរវិញ។ យោងតាម​ក្រសួងការងារ គិតត្រឹមថ្ងៃទី​១២ឧសភានេះ ពលករ​ខ្មែរនៅអារ៉ាប៊ីសាអូឌីតសរុប​​ចំនួន​ ៥២​នាក់ បានបញ្ជូន​មកដល់ប្រទេស​កម្ពុជា​​វិញ ខណៈពលករសេស​សល់ផ្សេង​​ទៀត ក្រសួងការងារអះអាង​​បញ្ជូន​មកកម្ពុជាវិញ​ជាបន្តបន្ទាប់​​​៕

រាជធានីភ្នំពេញ ៖ ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ សូមជម្រាបជូនសាធារណជនឲ្យបានជ្រាបថា ៖ ក្រោយឯកឧត្តម ឧត្តមសេនីយ៍ឯក ជួន ណារិន្ទ អគ្គស្មងការរង និងជាស្នងការនគរបាលរាជធានីភ្នំពេញ បញ្ជាឲ្យបើកការស្រាវជ្រាវករណីស្ដ្រីម្នាក់ ក្នុងរូបភាពជាមន្ដ្រីនគរបាល ថាជាកូនចៅរបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដែលប្រជាពលរដ្ឋអះអាងចោទប្រកាន់ថា បានចាញ់បោកលុយកាក់ទៅលើស្រ្តីនេះអស់ជាច្រើននោះ ។

នៅរសៀលថ្ងៃទី១១ ខែឧសភា ឆ្នាំ២០២៤ សមត្ថកិច្ចបញ្ជាក់អំពីលទ្ធផលនៃការស្រាវជ្រាវគឺស្ដ្រីក្នុងរូបភាពជានគរបាលនេះ គឺគ្រងឯកសណ្ឋានក្លែងបន្លំជានគរបាល គឺការពិតជាជនឆបោកប្រាកដមែន ពោលឈ្មោះស៊ុន ស៊ីន នៅលើផ្លាកឈ្មោះជាមនុស្សប្រុស បម្រើការងារនៅអគ្គនាយកដ្ឋានអន្ដោប្រវេសន៍ ហើយ អត្ដលេខ៨៦៣៤៣  ភេទប្រុស ជាមន្ដ្រី នៅនាយកដ្ឋាននគរបាលព្រហ្មទណ្ឌ។ ឯកឧត្តមស្នងការ ក៏បានអំពាវនាវជនរងគ្រោះក្នុងករណីបោកប្រាស់លុយកាក់នេះ សូមមកដាក់ពាក្យបណ្តឹងនៅស្នងការដ្ឋាននគរបាលរាជធានីភ្នំពេញរឺនៅអធិការដ្ឋាននគរបាលខណ្ឌព្រែកព្នៅ ដើម្បីអនុវត្តតាមនីតិវិធី៕

រាជធានីភ្នំពេញ៖ គ្រោះថ្នាក់ចរាចរណ៍ផ្លូវគោក ទូទាំងប្រទេសនៅថ្ងៃទី១២ ខែឧសភា ឆ្នាំ២០២៤ បានកើតឡើងចំនួន ១២លើក (យប់ ០៦លើក) បណ្តាលឲ្យមនុស្ស ស្លាប់ ០៤នាក់ (ស្រី ០០នាក់), រងរបួសសរុប ១៤នាក់ (ស្រី ០៣ក់), រងរបួសធ្ងន់ ១០នាក់ (ស្រី ០២នាក់) រងរបួសស្រាល ០៤នាក់ (ស្រី ០១នាក់) និងមិនពាក់មួកសុវត្ថិភាព ០៧នាក់ (យប់ ០៣នាក់)។

យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស ចេញដោយនាយក ដ្ឋាននគរបាលចរាចរណ៍ និងសណ្តាប់សាធារណៈ នៃអគ្គស្នងការដ្ឋាននគរបាលជាតិ។

របាយការណ៍ដដែលបញ្ជាក់ថា មូលហេតុដែលបង្កអោយមានគ្រោះថ្នាក់រួមមានៈ ៖ ល្មើសល្បឿន ០៨លើក (ស្លាប់ ០២នាក់, ធ្ងន់ ០៨នាក់, ស្រាល ០២នាក់) , មិនគោរពសិទិ្ឋ ០៣លើក (ស្លាប់ ០១នាក់, ធ្ងន់ ០២នាក់, ស្រាល ០០នាក់) និងប្រជែងគ្រោះថ្នាក់ ០១លើក (ស្លាប់ ០១នាក់, ធ្ងន់ ០០នាក់, ស្រាល ០២នាក់) ៕

(បន្ទាយមានជ័យ )៖ នៅព្រឹកថ្ងៃអាទិត្យ ៥ កើត ខែពិសាខ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី១២ ខែឧសភា ឆ្នាំ២០២៤  ក្រុមការងាររបស់អគ្គស្នងការដ្ឋាននគរបាលជាតិ ដឹកនាំដោយ លោកឧត្តមសេនីយ៍ទោ ស៊ុំ គឹមហ៊ួ ស្នងការរងហិរញ្ញកិច្ច និងភស្ភុភារ រួមក្រុមការងារ បានចុះធ្វើបច្ចុប្បន្នភាពបញ្ជីសារពើភណ្ឌ សម្ភារៈបច្ចេកទេស យុទ្ធោបករណ៍ នៅស្នងការដ្ឋាននគរបាលខេត្តបន្ទាយមានជ័យ ។

កិច្ច​ប្រជុំ​នេះមានការចូលរួមពី លោកឧត្តមសេនីត្រី វ៉ាត ចន្ថា ស្នងការរង តំណាងឱ្យ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងលោក​ ឧត្តមសេនីយ៍ត្រី ស្នងការរង លោកនាយការិយាល័យ នាយរង​ការិយាល័យ   អធិការនគរបាលក្រុងស្រុក ទាំង ៩ក្រុង-ស្រុក ។

លោកឧត្តមសេនីយ៍ត្រី វ៉ាត ចន្ថា បានជួបសំណេះសំណាល និងទទួលស្វាគមន៍ក្រុមការងារ និងរាយការណ៍ជូនពី បញ្ជីសារពើភណ្ឌ សម្ភារៈបច្ចេកទេស យុទ្ធោបករណ៍ របស់ស្នងការដ្ឋាននគរបាលខេត្ត រួមអធិការនគរបាលក្រុងស្រុកទាំង៩ ។

លោកឧត្តមសេនីយ៍ទោ ស៊ុំ គឹមហ៊ួ ស្នងការរងហិរញ្ញកិច្ច និងភស្ភុភារ បានលើកឡើងថា ៖ យោងលិខិតបង្គាប់ការលេខ ០១៨លបក ដែលចេញដោយឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានចាត់តាំងក្រុមការងាររបស់លោក ចុះធ្វើបច្ចុប្បន្នភាពបញ្ជីសារពើភណ្ឌ សម្ភារៈបច្ចេកទេស យុទ្ធោបករណ៍ នៅតាមរាជធានីខេត្ត ។ថ្ងៃនេះក្រុមការងារបានចុះ ធ្វើកិច្ចការនៅស្នងការដ្ឋាននគរបាលខេត្តបន្ទាយមានជ័យ លើកិច្ចការ ៖១-ត្រួតពិនិត្យនិងធ្វើបច្ចុប្បន្នភាពបញ្ជីសារពើភណ្ឌមធ្យោបាយសម្ភារៈបច្ចេកទេសនិងយុទ្ធោបករណ៍របស់អង្គភាព ២-សិក្សាអំពីតម្រូវការ នឹងផ្ដើមស្នើបំពាក់មធ្យោបាយ សម្ភារៈបច្ចេកទេស យទ្ធោបករណ៍ ដើម្បីគាំទ្រកិច្ចប្រតិបត្តិការ ។ ៣-របាយការណ៍បូកសរុបលទ្ធផលបច្ចុប្បន្នភាពបញ្ជីសារពើភណ្ឌមធ្យោបាយ សម្ភារៈបច្ចេកទេស យុទ្ធោបករណ៍៕

​ពោធិ៍សាត់​ ៖​ នៅ​ព្រឹក​ថ្ងៃ​អង្គារ​១១​កើត​ ខែភទ្របទ​ ឆ្នាំខាល​ ចត្វា​ស័ក​ ព​.​ស​ ២៥៦៦​ ត្រូវ​នឹង​ថ្ងៃ​ទី​០៦​ ខែកញ្ញា​ ឆ្នាំ​២០២២​ ខណ្ឌ​រដ្ឋបាល​ជលផល​ នៃ​មន្ទីរ​កសិកម្ម​រុក្ខា​ប្រមាញ់​និង​នេសាទ​ខេត្តពោធិ៍សាត់​ លោក​ ភុ​ន​ សុ​វ​ណ្ណា​ នាយ​ផ្នែក​ក្រគរ​ លោកនាយ​សង្កាត់​កំពង់​លួង​ សហការ​ជាមួយ​ក្រុមការងារ​ថ្នាក់​ជាតិ​ បង្ក្រាប​បទល្មើស​ជលផល​ប្រចាំការ​ នៅ​បឹង​ទន្លេសាប​មា​នទី​តាំងនៅ​កន្លែង​អភិរក្ស​ជលផល​ជ្រោយ​ស្ដី​ ដឹកនាំ​ដោយ​លោក​វរសេនីយ៍ឯក​  គុ​ជ​ សុភាព​ តំណាង​អគ្គស្នងការ​នគរបាល​ជាតិ​ រួម​មាន​កម្លាំង​អធិការដ្ឋាន​រដ្ឋបាល​ជលផល​ខាងត្បូង​បឹង​ទន្លេសាប​ នគរបាល​ប្រឆាំង​បទល្មើស​សេដ្ឋកិច្ច​ខេត្ត​ កងរាជអាវុធហត្ថ​ខេត្ដ​-​ស្រុក​ក្រគរ​  ដែល​មាន​កម្លាំង​សរុប​ចំនួន​ ៣២​នាក់​និង​កាណូត​ចំនួន​៣​គ្រឿង​ បាន​ចុះ​អធិការកិច្ច​និង​បង្ក្រាប​បទល្មើស​នេសាទ​ខុសច្បាប់​នៅ​ផ្ទៃ​បឹង​ទន្លេសាប​ ចំណុច​ក្រចាប់​ ឃុំ​អ​ន្សា​ចំបក់​ ស្រុក​ក្រគរ​ ជាប់​ព្រំប្រទល់​ខេត្តពោធិ៍សាត់​-​ខេត្តកំពង់ឆ្នាំង​ ។​

​លោក​វរសេនីយ៍ឯក​ សៀន​ វិ​រ​:​ នាយការិយាល័យ​នគរបាល​ប្រឆាំង​បទល្មើស​សេដ្ឋកិច្ច​ នៃ​ស្នងការដ្ឋាន​នគរបាល​ខេត្តពោធិ៍សាត់​ បាន​ឲ្យ​ដឹង​ថា​ កាលពី​ថ្ងៃ​ទី​០៥​ ខែកញ្ញា​ ឆ្នាំ​ ២០២២​ វេលា​ម៉ោង​០១​និង​២៥​នាទី​រសៀល​ ស្នងការដ្ឋាន​នគរបាល​ខេត្តពោធិ៍សាត់​ បាន​ទទួលបញ្ជា​ពី​ទូរស័ព្ទ​ប្រចាំ​បញ្ជា​លេខ​ 023727105​ របស់​អគ្គស្នងការ​នគរបាល​ជាតិ​ ថា​មាន​ប្រជាពលរដ្ឋ​ប្ដឹង​ករណី​លួច​ប្រព្រឹត្ដ​បទល្មើស​នេសាទ​ខុសច្បាប់​ នៅ​ផ្ទៃ​បឹង​ទន្លេសាប​ ចំណុច​ក្រចាប់​ ឃុំ​អ​ន្សា​ចំបក់​ ស្រុក​ក្រគរ​ ជាប់​ព្រំប្រទល់​ខេត្ត​ ពោធិ៍សាត់​-​កំពង់ឆ្នាំង​ ព្រមទាំង​បាន​សំណូមពរ​ឲ្យ​សមត្ថកិច្ច​ជំនាញ​ពាក់ព័ន្ធ​ចុះ​បង្ក្រាប​ករណី​នេះ​ផង​ដែរ​ ។​

​កម្លាំង​សមត្ថកិច្ច​ចម្រុះ​បាន​សហការ​ចុះ​ពិនិត្យ​ជាក់ស្ដែង​ និង​អធិការកិច្ច​រួច​ ក្រុមការងារ​បាន​ធ្វើការ​រុះរើ​បំផ្លាញ​ចោល​នឹង​វត្ថុ​តាង​រួម​មាន​ ៖​ -​របាំង​ស្បៃ​មុង​០៦​ខ្សែ​ ប្រវែង​ ១៧៥០​ម៉ែត្រ​ -​លូ​កង​ស្បៃ​មុង​ចំនួន​ ១៥​គ្រឿង​ -​បង្គោល​ចំនួន​២៥០​ដើម​ និង​កូន​ត្រី​ចម្រុះ​ចំនួន​៥៥​គីឡូក្រាម​ ។​

​លោក​វរសេនីយ៍ឯក​ សៀន​ វិ​រ​:​ បាន​បន្ត​ទៀត​ថា​ ចំពោះ​វត្ថុ​តាង​ខាងលើ​ ត្រូវ​បាន​កម្លាំង​សមត្ថកិច្ច​ចម្រុះ​យើង​បំផ្លាញ​ចោល​នៅ​ហ្នឹង​កន្លែង​ និង​បាន​លែង​កូន​ត្រី​ចម្រុះ​ចំនួន​៥៥​គីឡូក្រាម​ចូល​ក្នុង​ទឹកទន្លេ​វិញ​ ៕