Home

អ៊ីរ៉ង់ព្រ.មានថាបើអាមេរិកហ៊ានប៉ះពាល់ខ្លួនអាចត្រូវព្រនង់យ៉ាងដំណំ

ទីក្រុងតេអេរ៉ង់៖ អគ្គមគ្គុទ្ទេសក៍អ៊ីរ៉ង់ព្រមានថាបើអាមេរិក ឬប្រទេសដទៃហ៊ានធ្វើអ្វីអ៊ីរ៉ង់ ពួកគេប្រាកដជាត្រូវព្រនង់ជាមិនខាន។ ប្រសាសន៍របស់មេដឹកនាំអ៊ីរ៉ង់រូបនេះផ្សាយតាមទូរទស្សន៍ និងត្រូវគេយកទៅបង្ហោះនៅលើបណ្ដាញសង្គមជាផ្លូវការរបស់រដ្ឋ។ ការព្រមាននេះក៏កើតមានឡើងនៅពេលសភាពការណ៍កាន់តែឡើងកម្ដៅរវាងទីក្រុងវ៉ាស៊ីនតោន និងតេអេរ៉ង់។

ម៉្យាងទៀត ការព្រមាននេះកើតឡើងបន្ទាប់ពីលោកត្រាំចេញសេចក្ដីប្រកាសកាលពីថ្ងៃចន្ទថាអ៊ីរ៉ង់ត្រូវតែជាអ្នកទទួលខុសត្រូវចំពោះករណីដែលក្រុមហ៊ូទីវាយប្រហារនាវាដឹកទំនិញនៅសមុទ្រក្រហម។ ក្រុមហ៊ូទីកំពុងគ្រប់គ្រងប្រទេសយេម៉ែនភាគច្រើន និងកំពុងធ្វើសកម្មភាពយោធាយ៉ាងពុះកញ្ជ្រោល ហេតុនេះអាមេរិកចាត់វិធានការវាយប្រហារមូលដ្ឋានរបស់ពួកគេ។

សង្គ្រាមនៅមជ្ឈិមបូព៌ាមិនទាន់បង្ហាញសញ្ញាធូរស្បើយនៅឡើយទេ។ បន្ទាប់ពីអាមេរិកវាយប្រហារមូលដ្ឋានខ្លួនរបស់ក្រុមហ៊ូទី និងបន្ទាប់ពីអ៊ីស្រាអែលផ្ទុះសង្គ្រាមជាថ្មីនៅហ្កាហ្សា ហ៊ូទីក៏សច្ចាថាខ្លួនមិនដកថយជាដាច់ខាត។ ថ្មីៗនេះ ហ៊ូទីបាញ់មីស៊ីលចូលអ៊ីស្រាអែល ធ្វើឱ្យអ៊ីស្រាអែលបញ្ចេញសំឡេងស៊ីរ៉ែនស្រែកកងរំពងពាសពេញទីក្រុងតែឡាវីវ និងយេរូសាឡឹម។

ដោយសារអ៊ីរ៉ង់ជាអ្នកគាំទ្រក្រុមហ៊ូទីនៅយេម៉ែន, ក្រុមហេសបូឡានៅលីបង់ និងក្រុមហាម៉ាស់នៅហ្កាហ្សា ដូច្នេះ ធ្វើឱ្យគេព្រួយបារម្ភថាសង្គ្រាមនៅមជ្ឈិមបូព៌ាអាចនឹងផ្ទុះឡើងកាន់តែខ្លាំង។ អ៊ីរ៉ង់ខ្លួនឯងក៏កំពុងមានបញ្ហាពាក់ព័ន្ធនឹងកម្មវិធីនុយក្លេអ៊ែរផងដែរ។ អ៊ីស្រាអែលអាចនឹងវាយប្រហារទីតាំងនុយក្លេអ៊ែររបស់អ៊ីរ៉ង់នៅថ្ងៃណាមួយដោយមានជំនួយ និងការគាំទ្រពីអាមេរិក។ អាមេរិកនិយាយរួចហើយថាខ្លួនមិនអាចបណ្ដោយឱ្យអ៊ីរ៉ង់ផលិតអាវុធនុយក្លេអ៊ែរបានសម្រេចជាដាច់ខាត។

នៅថ្ងៃសុក្រសប្ដាហ៍នេះ អគ្គមគ្គុទេសក៍អ៊ីរ៉ង់ប្រកាសច្រានចោលការអះអាងរបស់អាមេរិកដែលថាក្រុមចលនាប្រដាប់អាវុធទាំងនោះជាកូនចៅរបស់អ៊ីរ៉ង់។ អ៊ីរ៉ង់ថាពួកគេជាក្រុមឯករាជ្យ-ម្ចាស់ការ។ ដូច្នេះអ៊ីរ៉ង់គ្មានបានបង្គាប់បញ្ជាពួកគេទេ។ កាលពីដើមខែមីនា លោកត្រាំថ្លែងថាលោកបានផ្ញើលិខិតមួយច្បាប់ជូនអគ្គមគ្គុទេសក៍អ៊ីរ៉ង់ដើម្បីជំរុញឱ្យគាត់ជ្រើសរើសយកផ្លូវចរចាគ្នាពាក់ព័ន្ធនឹងកម្មវិធីនុយក្លេអ៊ែរ។ បើសិនអ៊ីរ៉ង់ហ៊ានជំទាស់នឹងបំណងល្អនេះ ត្រាំព្រមានប្រើប្រាស់កម្លាំងយោធា។

រដ្ឋមន្ត្រីការបរទេសអ៊ីរ៉ង់ចាត់ទុកថាលិខិតនោះមានចរិតគំរាមកំហែង។ ប៉ុន្តែយ៉ាងហោចណាស់វាជាការបោះដៃរកគ្នាទៅវិញទៅមក ហើយជាឱកាសសម្រាប់ការសន្ទនាគ្នា។ រដ្ឋមន្ត្រីរូបនេះថ្លែងថាអ៊ីរ៉ង់កំពុងពិភាក្សាគ្នាដើម្បីរកវិធីឆ្លើយតបបែបណាចំពោះលិខិតនោះ។ អគ្គមគ្គុទេសក៍អ៊ីរ៉ង់ធ្លាប់បានច្រានចោលការបោះដៃរបស់លោកត្រាំមួយសាហើយ ហើយចោទប្រកាន់ថាលោកត្រាំនិយាយបានតែនៅលើបបូរមាត់ថាចង់ចរចាគ្នា។ ប៉ុន្តែធាតុពិត គាត់ចូលចិត្តនិយាយសម្លុត និងគំរាមកំហែងគេ៕

March 22, 2025

ព័ត៌មានអន្តរជាតិ
ក្រោយចូលបំភ្លឺពាក្យ«ចំចាត់ក្មេងទំនើង និងចោរប្លន់ឲ្យអស់ ទើបអាចនិយាយបានថា យើងមានសន្តិភាព» គ្រូជោគជ័យ អនុញ្ញាតឲ្យទៅផ្ទះវិញ

រាជធានីភ្នំពេញ ៖ ក្រោយពីបានចូលបំភ្លឺ នូវពាក្យថា “ចំចាត់ក្មេងទំនើង និងចោរប្លន់ឲ្យអស់ ទើបអាចនិយាយបានថា យើងមានសន្តិភាព” គ្រូជោគជ័យ ត្រូវបានសមត្ថកិច្ចអនុញ្ញាតិឲ្យទៅផ្ទះវិញ នោះជាការលើកឡើងរបស់លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ដែលមានខ្លឹមសារទាំងស្រុងថា ៖ សូមជម្រាបជូនអំពីករណីបុរសម្នាក់ឈ្មោះ ប៊ុន រស្មី ហៅ ប៊ុន ផាត ដែលបានប្រើពាក្យបង្ហោះនៅក្នុងបណ្តាញសង្គម ពាក់ពន្ធនិងខ្លឹមសារ “ចំចាត់ក្មេងទំនើង និងចោរប្លន់ឲ្យអស់ ទើបអាចនិយាយបានថា យើងមានសន្តិភាព” ។

លោកវរសេនីយ៍ឯក សំ វិច្ឆិកា បន្តថា ពាក់ពន្ធករណីនេះ បុរសរូបនេះ នៅព្រឹកមិញ គឺវេលាម៉ោង០៩និង៣០នាទីថ្ងៃទី២១ ខែមីនា ឆ្នាំ២០២៥ បានចូលខ្លួនទៅតាមពេលវេលា នៃការកោះអញ្ជើញរបស់ស្នងការដ្ឋាននគរបាលរាជធានីភ្នំពេញ ហើយបានជួបជាមួយនឹងមន្ត្រីជំនាញ នៃស្នងការដ្ឋាននគរបាលរាជធានីភ្នំពេញ ហើយយើងធ្វើការសួរនាំ អំពីខ្លឹមសារ ដែលគាត់បានបង្ហោះផ្សព្វផ្សាយលើបណ្តាញសង្គមពាក់ពន្ធ និងហៅថា ពាក្យសន្តិភាព ។

លោកវរសេនីយ៍ឯក សំ វិច្ឆិកា បន្តទៀតថា អ៊ីចឹង ក្រោយពីការសាកសួរ អស់រយៈពេល០២ ទៅ៣ម៉ោង ចុងក្រោយគឺគាត់បានទទួលសារភាព និងទទួលការយល់ខុស អំពីពាក្យសន្តិភាព និងអំពីពាក្យ កំចាត់ក្មេងទំនើង និងអំពើចោរកម្ម ។ ឥឡូវនេះ គាត់បាននិយាយបកស្រាយតាមផេកផ្លូវការរបស់គាត់ អំពីអ្វី ដែលជាតម្លៃ នៃសន្តិភាព ហើយបែងចែកអំពីអ្វី ដែលជាកិច្ចការងារ សន្តិសុខ សណ្តាប់ធ្នាប់ ដែលសមត្ថកិច្ចបានយកចិត្តទុកដាក់ ។

លោកវរសេនីយ៍ឯក សំ វិច្ឆិកា បានអោយដឹងទៀតថា ការផ្សារភ្ជាប់ នូវខ្លឹមសាររបស់គាត់នោះ គឺដោយសារតែ ទី១ គាត់បានយល់ ហើយបានឃើញអំពីសកម្មភាពករណីចោរឆក់កាបូបលើស្ត្រីបរទេសម្នាក់ និងសង្សាររបស់គាត់ នៅសង្កាត់វត្តភ្នំ ខណ្ឌដូនពេញ នាពេលកន្លងទៅ ហើយគាត់ ក៏មានអារម្មណ៍មួយថា អ្វីដែលជាការពាក់ព័ន្ធកិច្ចការងារសន្តិសុខ គឹលោកចង់ជំរុញឲ្យមានការបង្ការ ទប់ស្កាត់ និងបង្ក្រាប ឲ្យមានសុខសុវត្ថិភាព កុំឲ្យមានការភ្ញាក់ផ្អើលដល់ជនបរទេស ។ ប៉ុន្តែអ្វី ដែលយើងបានឃើញ និងការទទួលស្គាល់កំហុសរបស់គាត់ គាត់ថា អ្វីដែលជាកិច្ចការងារថែរក្សាការពារសន្តិសុខ គាត់បានទទួលយក ថា សមត្ថកិច្ចបានយកចិត្តទុកដាក់ ស្រាវជ្រាវ បង្ក្រាប រាល់កិច្ចការបង្កាទប់ស្កាត់បញ្ហាបទល្មើសគ្រប់ប្រភេទ ។

អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បញ្ជាក់ថា អ៊ីចឹង កិច្ចការងារនេះ បើតាមគោលការណ៍របស់លោកឧត្តមសេនីយ៍ឯក ជួន ណារិន្ទ អគ្គស្នងការរង ជាស្នងការនគរបាលរាជធានីភ្នំពេញ នៅព្រឹកថ្ងៃដដែល គឺសមត្ថកិច្ច បានអនុញ្ញាតឲ្យបុរសឈ្មោះ ប៊ុន រស្មី ហៅ ប៊ុន ផាត ត្រឡប់ទៅលំនៅឋានវិញហើយ គ្រាន់តែឲ្យធ្វើកិច្ចសន្យាបញ្ឈប់ការផ្សព្វផ្សាយ នូវកិច្ចការងារ និងខ្លឹមសារមួយចំនួន ដែលមិនទាន់បានយល់អំពីអត្ថន័យ ដែលយើងប្រើប្រាស់ខុសឆ្គង នូវពេលវេលា ក៏ដូចខុសឆ្គង នូវពាក្យពេចន៍មួយចំនួន ដែលយើងមិនអាចយកមកផ្សារភ្ជាប់ជាមួយគ្នាបានទេ ៕

March 22, 2025

សន្ដិសុខសង្គម
រដ្ឋបាលរាជធានីភ្នំពេញ ត្រៀមរថយន្ដក្រុងជិត៦០០គ្រឿង ដឹកជញ្ជូនប្រជាពលរដ្ឋ ឥតគិតថ្លៃ រយៈពេល៦ថ្ងៃ បុណ្យចូលឆ្នាំខ្មែរ

default

រាជធានីភ្នំពេញ ៖ យោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញ បានឱ្យដឹងថា ដោយអនុវត្តតាមប្រសាសន៍ដឹកនាំដ៏ខ្ពង់ខ្ពស់បំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានថ្លែងក្នុងពិធីបិទសន្និបាតការងារ ឆ្នាំ២០២៤ និងលើកទិសដៅការងារ ឆ្នាំ២០២៥ របស់ក្រសួងមុខងារសាធារណៈ កាលពីថ្ងៃទី២០ ខែមីនា ឆ្នាំ២០២៥ រដ្ឋបាលរាជធានីភ្នំពេញ នឹងរៀបចំរថយន្តក្រុងចំនួន ៥៩៧គ្រឿង សម្រាប់បម្រើសេវាដឹកជញ្ជូនសាធារណៈ ដោយមិនបង់ប្រាក់ រយៈពេល ០៦ថ្ងៃ ចាប់ពីថ្ងៃទី១២ ដល់ ថ្ងៃទី១៧ ខែមេសា ឆ្នាំ២០២៥ ដើម្បីជួយសម្រួលដល់ការចំណាយរបស់បងប្អូន ប្រជាពលរដ្ឋទាំងអស់ក្នុងការធ្វើដំណើរទៅលេងស្រុកកំណើត ជួបជុំបងប្អូនក្រុមគ្រួសារ និងទៅកម្សាន្តសប្បាយ សង្ក្រាន្តឆ្នាំថ្មី នៅតាមបណ្តាខេត្តនានា ក្នុងឱកាសអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់សប្តស័ក ពុទ្ធសករាជ ២៥៦៩ ដោយក្នុងនោះ រួមមាន ៖

១-សេវាដឹកជញ្ជូន ប្រជាពលរដ្ឋក្នុងភូមិសាស្ត្ររាជធានីភ្នំពេញ៖ ប្រើប្រាស់រថយន្តក្រុងចំនួន ១០០គ្រឿង សម្រាប់បម្រើដល់ប្រតិបត្តិការតម្រាយ៍ខ្សែរត់ជាប្រក្រតីក្នុងរាជធានីភ្នំពេញ ។

២-សេវាដឹកជញ្ជូនប្រជាពលរដ្ឋ ដែលនឹងធ្វើដំណើរពីរាជធានីភ្នំពេញទៅតាមបណ្តាខេត្ត និងពីបណ្តា ខេត្តត្រឡប់មករាជធានីភ្នំពេញវិញ៖ ប្រើប្រាស់រថយន្តក្រុងចំនួន ៤៩៧គ្រឿង ព្រមទាំងបានរៀបចំ ទឹកពិសាបរិសុទ្ធដោយឥតគិតថ្លៃនៅក្នុងរថយន្តក្រុងនីមួយៗ តាមគោលដៅចេញដំណើរផងដែរ ដែលមានគោលដៅ ទីតាំង និងពេលវេលាចេញដំណើរលម្អិត ដូចខាងក្រោម៖

March 22, 2025

ព័ត៌មានជាតិ
អាជ្ញាធរភ្នំពេញ នឹងរៀបចំ សង្ក្រាន្តវត្តភ្នំ ឱ្យកាន់តែល្អ ព្រោះថា«សង្ក្រាន្ដ»ឆ្នាំនេះ រាជរដ្ឋាភិបាលកំពុងរៀបចំដាក់បញ្ចូលទៅក្នុងសម្បត្តិបេតិកភណ្ឌពិភពលោកអរូបីយ៍

រាជធានីភ្នំពេញ ៖ លោក កើត ឆែ អភិបាលរងរាជធានីភ្នំពេញ បានធ្វើការណែនាំឱ្យមន្ទីរវប្បធម៌ វិចិត្រសិល្បៈ រាជធានីភ្នំពេញ និងមន្ទីរសាធារណការ និងដឹកជញ្ជូនរាជធានីភ្នំពេញ ព្រមទាំងអាជ្ញាធរពាក់ព័ន្ធទាំងអស់ត្រូវរៀបចំ “សង្ក្រាន្តវត្តភ្នំ” ២០២៥ នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ នាឆ្នាំម្សាញ់ ឆ្នាំ២០២៥នេះ ឱ្យបានល្អបំផុត ដោយសារថា «សង្ក្រាន្ដ» នេះ រាជរដ្ឋាភិបាលកម្ពុជា កំពុងរៀបចំដាក់បញ្ចូលទៅក្នុងសម្បត្តិបេតិកភណ្ឌពិភពលោកអរូបីយ៍ ។

ការណែនាំបែបនេះ របស់លោក កើត ឆែ អភិបាលរងរាជធានីភ្នំពេញ បានធ្វើឡើងនារសៀលថ្ងៃទី២០ មីនានេះ ខណៈលោកបានអញ្ជើញជាអធិបតីតំណាងលោក ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុងកិច្ចប្រជុំស្តីពីការត្រៀមរៀបចំ “សង្ក្រាន្តវត្តភ្នំ” ២០២៥ នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ ដើម្បីចូលរួមអបអរសាទរក្នុងឱកាសពិធីបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ខាងមុខនេះ នៅសាលារាជធានីភ្នំពេញ ។

លោក កើត ឆែ បានមានប្រសាសន៍ថា ថ្មីៗនេះមានបណ្តាញសង្គមមួយនោះ បានចុះផ្សាយព័ត៌មានខុសពីការពិត ដោយថា «ភ្នំពេញដូនពេញ ក្លាយជាទីកន្លែងសក្ការៈរបស់យួនហើយ»។ ការបង្ហោះ នូវព័ត៌មានក្លែងក្លាយខុសពីការពិតនេះ ពួកគេធ្វើឡើង ដើម្បីបំផ្លាញជាតិរបស់យើង ។

លោកបញ្ជាក់ថា ៖ ពួកអគតិ តែងតែប្រឆាំងនៅពេល ដែលពួកគេបានដឹងថា រាជរដ្ឋាភិបាលបង្កើតបាននៅសមិទ្ធផលធំៗជូនជាតិ។ ជាក់ស្តែងពេលនេះ រាជរដ្ឋាភិបាលរបស់យើងកំពុងរៀបចំ «សង្ក្រាន្ដ»នេះដាក់បញ្ចូលទៅក្នុងសម្បត្តិបេតិកភណ្ឌពិភពលោកអរូបីយ៍ ទើបពួកគេបង្កើតឱ្យមានជាព័ត៌មានក្លែងក្លាយខុសពីការពិតនេះឡើង។ ដូចច្នេះទេ សូមឱ្យទាំងអស់គ្នារៀបចំ “សង្ក្រាន្តវត្តភ្នំ” នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ ដើម្បីអបអរសាទរក្នុងឱកាសពិធីបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ខាងមុខនេះឱ្យបានល្អបំផុត ។

“សង្ក្រាន្តវត្តភ្នំ” នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ មានរយៈពេល ០៤ថ្ងៃ ដោយចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៥ ហើយក្នុងកិច្ចប្រជុំស្តីពីការត្រៀមរៀបចំ “សង្ក្រាន្តវត្តភ្នំ”នេះ បានលើកឡើងពីការរៀបចំជាកន្លែងទទួលទេវតាឆ្នាំថ្មី ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្ដែងសិល្បៈ របាំប្រពៃណី របាំបុរាណ ល្បែងប្រជាប្រិយជាតិ ប្រគំតន្ត្រីបុរាណ-សម័យ រាំលេងកម្សាន្ត តាំងបង្ហាញឧបករណ៍តន្ត្រីបុរាណជាដើម។ បន្ថែមពីនេះ កិច្ចប្រជុំនេះ ក៏បានលើកឡើងពីការគិតគូរលើការជួសជុលសួនកុមារ ជួសជុលនាឡិកាជួសជុលរមណីយដ្ឋានវប្បធម៌ប្រវត្តិសាស្ត្រវត្តភ្នំ តុបតែងភ្លើងបន្ថែមទាំងនៅខាងក្នុង និងខាងក្រៅរមណីយដ្ឋានវត្តភ្នំ និងតំបន់ជុំវិញវត្តភ្នំ ។

បន្ថែមពីនេះ “សង្ក្រាន្តវត្តភ្នំ” ក៏នឹងត្រូវភ្ជាប់ជាមួយផ្លូវថ្មើរជើង (Walk Street) ភ្នំពេញផងដែរ ពោលគឺផ្លូវថ្មើរជើងនឹងបើកបន្តទៅដល់ទៅ៥ថ្ងៃ ដោយបន្ថែម៣ថ្ងៃ នៃថ្ងៃចូលឆ្នាំរហូតបញ្ចប់បុណ្យចូលឆ្នាំថ្មី ៕

March 21, 2025

ព័ត៌មានជាតិ, ព្រឹត្តិការណ៍សំខាន់ៗ
ប៉ូឡូញត្រៀមបង្កើតចម្ការមីនធ្វើជាខែលការពារនៅព្រំដែនជាប់នឹងរុស្ស៊ី

ទីក្រុងវ៉ាសូវី៖ ប៉ូឡូញចង់ប្រែក្លាយព្រំដែនខាងកើតរបស់រដ្ឋជាសមាជិកអង្គការណាតូដែលជាប់នឹងប្រទេសរុស្ស៊ីទៅជាចម្ការមីន។ ប៉ូឡូញត្រៀមដកខ្លួនពី «សន្ធិសញ្ញាប្រឆាំងគ្រាប់មីន» ដើម្បីមានសិទ្ធិប្រើគ្រាប់មីនដោយស្របច្បាប់។ ចំណាត់ការនេះធ្វើឡើងបន្ទាប់ពីសភាពការណ៍ប្រែប្រួល គួបផ្សំនឹងចរិតឈ្លានពានរបស់រុស្ស៊ី។ នេះបើតាមការផ្សាយរបស់កាសែតRMF24។

ការដែលប៉ូឡូញសម្រេចចិត្តដកខ្លួនថយពីអនុសញ្ញាទីក្រុងអូតាវ៉ានោះអាចល្មមគ្រប់គ្រាន់សម្រាប់មនុស្សទូទៅយល់បានថាអឺរ៉ុបកំពុងសម្លឹងឃើញរុស្ស៊ីជាប្រទេសឈ្លានពានមកលើខ្លួនកាន់តែខ្លាំង។ នេះគ្រាន់តែជាវិធានការបឋមៗតែប៉ុណ្ណោះសម្រាប់ទប់ទល់ជាមួយរុស្ស៊ីដែលប៉ូឡូញព្យាករថាទៅថ្ងៃអនាគតអាចនឹងមានជម្លោះប្រដាប់អាវុធជាមួយគ្នាជាមិនខាន។

ប៉ូឡូញចាប់ផ្ដើមរៀបជើងព្រួលជាបណ្ដើរៗហើយនៅក្នុងសេណារីយោដែលអាចផ្ទុះសង្គ្រាមលោកលើកទីបី។ ដូច្នេះប៉ូឡូញត្រៀមផ្សព្វផ្សាយគោលការណ៍ណែនាំស្ដីពីការជួយសង្គ្រោះអាយុជីវិតខ្លួនឯងនៅក្នុងគ្រាអាសន្ននាដំណាច់ឆ្នាំ២០២៥។ ប៉ូឡូញក៏កំពុងសាងសង់ខែលការពារព្រំដែនខាងកើតផងដែរ។ ក្រុមអ្នកតំណាងរាស្ត្រប៉ូឡូញចាត់ទុកថានេះជាប្រតិបត្តិការសឹកដ៏ធំបំផុតមិនធ្លាប់មានចាប់តាំងពីក្រោយសង្គ្រាមលោកលើកទី២។

នៅក្នុងបទសម្ភាសកាលពីពេលថ្មីៗនេះ អ្នកសារព័ត៌មានសួរអនុរដ្ឋមន្ត្រីការពារជាតិប៉ូឡូញថា «តើប៉ូឡូញត្រូវតែដកខ្លួនពីសន្ធិសញ្ញាប្រឆាំងគ្រាប់មីនដែរឬទេ?»។ លោកឆ្លើយតបថាយើងគ្មានជម្រើសផ្សេងទេ។ លោកថាសភាពការណ៍នៅតាមព្រំដែនឈានដល់ដំណាក់កាលគ្រោះថ្នាក់ខ្លាំង។ លោកចង់និយាយសំដៅទៅលើតំបន់ព្រំដែនរវាងប៉ូឡូញ-បេឡារូស និងប៉ូឡូញ-រុស្ស៊ី។ លោកចាត់ទុកថាព្រំដែនទាំង២នេះជាធាតុផ្សំដ៏សំខាន់នៃផែនការសាងសង់ខែលការពារនៅភាគខាងកើត។

លោកយល់ថាឥឡូវនេះបេឡារូសប្រៀបដូចជាមនុស្សតែមួយជាមួយរុស្ស៊ីទៅហើយ។ នៅពេលលោកពូទីននិយាយអ្វី លោកលូកាសឹនកូ (ប្រធានាធិបតីបេឡារូស) ចាំតែថាតាម និងចាំតែធ្វើតាមតែប៉ុណ្ណោះ។ អនុរដ្ឋមន្ត្រីប៉ូឡូញរូបនេះបាននិយាយរំលឹកទៅដល់ថ្ងៃដែលរុស្ស៊ីវាយលុកចូលអ៊ុយក្រែនកាលពីឆ្នាំ២០២២គឺមានចំណុចចាប់ផ្ដើមចេញពីទឹកដីបេឡារូសនេះតែម្ដង។ បច្ចុប្បន្ននេះ ប៉ូឡូញគ្មានគ្រាប់មីននៅក្នុងដៃទេ។ ប៉ុន្តែប៉ូឡូញមានសមត្ថភាពអាចផលិតបាននាពេលអនាគត។

កាលពីថ្ងៃអង្គារ ប្រទេសសមាជិកអង្គការណាតូចំនួនបួនគឺប៉ូឡូញ ឡាតវី អេស្តូនី និងលីទុយអានី បានប្រកាសថាខ្លួននឹងដកខ្លួនពីសន្ធិសញ្ញាប្រឆាំងគ្រាប់មីន។ សន្ធិសញ្ញានេះបង្កើតឡើងដំបូងកាលពីឆ្នាំ១៩៩៧។ រហូតមកដល់ពេលនេះ ប្រទេសជាង១៦០បានផ្ដល់សច្ចាប័ន។ ប៉ុន្តែប្រទេសខ្លះមិនផ្ដល់សច្ចាប័នទេដោយសារហេតុផលសន្តិសុខជាតិ។ មានន័យថាពួកគេត្រូវការរក្សាទុកគ្រាប់មីន។ ឧទាហរណ៍ដូចជាអាមេរិក និងកូរ៉េខាងត្បូងមិនដែលបានផ្ដល់សច្ចាប័នម្ដងណាទេ។ ពួកគេត្រូវការរក្សាទុកមីនរាប់លានគ្រាប់នៅតំបន់គ្មានកងទ័ព (ព្រំដែនកូរ៉េទាំង២) ចាប់តាំងពីក្រោយសង្គ្រាមកូរ៉េ១៩៥០-៥៣៕

March 21, 2025

ព័ត៌មានអន្តរជាតិ
រថយន្ត១គ្រឿង ឆ្លងចរន្តខ្សែភ្លើងឆាបឆេះសន្ធោសន្ធៅនៅស្រុកស្វាយទាប

ខេត្តស្វាយរៀង ៖ រថយន្តមួយគ្រឿង ខណៈកំពុងតែបើកបរនៅលើដងផ្លូវ ត្រូវអណ្តាតភ្លើងឆាបឆេះយ៉ាងសន្ធោសន្ធៅ រហូតអស់សល់តែគ្រោងឆ្អឹង ។

បើតាមសមត្ថកិច្ចបានឲ្យដឹងថា ករណីនេះ បានកើតឡើងនៅវេលាម៉ោង១១និង២០នាទីព្រឹកថ្ងៃទី២០ មីនា ២០២៥ នៅលើកំណាត់ផ្លូវលេខ៣១៤D ស្ថិតនៅភូមិត្រពាំងរុន ឃុំប្រសូត្រ ស្រុកស្វាយទាប ។

ប្រភពបន្តថា រថយន្ត ដែលឆេះម៉ាក MORNING ហើយមូលហេតុ គឺបណ្ដាលមកពីឆ្លងចរន្តខ្សែភ្លើងក្នុងរថយន្ត បណ្តាលឲ្យឆាបឆេះតែម្តង ។

ប្រភពបន្តទៀតថា រថយន្តខាងលើនេះ ខណៈកំពុងបើកបរលើដងផ្លូវសុខៗ ស្រាប់តែម្ចាស់រថយន្ត បានចាប់ហ្វ្រាំងឈប់បន្ទាន់ រួចបើកទ្វារថយន្តរត់ចេញ ហើយស្រែកហៅឲ្យអ្នកស្រុក ជួយពន្លត់ភ្លើង តែមិនរលត់ ក៏ទូរសព្ទហៅសមត្ថកិច្ចនគបាលស្រុកស្វាយទាប ឲ្យជួយអន្តរាគមន៍ ។

លោកអធិការដ្ឋាននគបាលស្រុក ក៏បានបញ្ជាឲ្យយករថយន្តពន្លត់អគ្គិភ័យចំនួន២គ្រឿង ទៅបាញ់ទឹកពន្លត់ និងបានរលត់ភ្លើងទាំងស្រុងនៅវេលាម៉ោង១១និង២៥នាទីថ្ងៃដដែល ក៏ប៉ុន្តែភ្លើងបានឆាបឆេះរថយន្តអស់ទាំងស្រុងទៅហើយ នៅសល់តែគ្រោងឆ្អឹងគួរឲ្យសោកស្តាយ ៕

March 21, 2025

សន្ដិសុខសង្គម
ព្រលឹងជនរងគ្រោះអន្ទងឃា.តកឲ្យសមត្ថកិច្ចចាប់ខ្លួនបានហើយ ករណីចា.ក់សម្លា.ប់បុគ្គលិកហាងម៉ាស្សាគីណេស

រាជធានីភ្នំពេញ ៖ ទីបំផុត ព្រលឹងជនរងគ្រោះបានអន្ទងជនសង្ស័យជាឃា.តកឲ្យសមត្ថកិច្ចចាប់ខ្លួន ករណីឃា.តកម្មដោយប្រើកាំបិតចុងស្រួចចា.ក់សម្លា.ប់ទៅលើបុគ្គលិកបម្រើការងារនៅហាងម៉ាស្សាយីហោ គីណេស ជាមួយគ្នា ខណៈជនដៃដល់ព្យាយាមគេចខ្លួនបានត្រឹមតែ៣ថ្ងៃប៉ុណ្ណោះ ។

ជនសង្ស័យមានឈ្មោះ ថា វ៉ាន់ឌី ភេទប្រុស អាយុ៣៥ឆ្នាំ មុខរបរ បុគ្គលិកម៉ាស្សា ឃាត់ខ្លួននៅផ្ទះគ្មានលេខ ភូមិពាម ឃុំរកា កោងទី១ ស្រុកមុខកំពូល ខេត្តកណ្ដាល ។

សូមជម្រាបថា ៖ កាលពីថ្ងៃទី១៦ ខែមីនា ឆ្នាំ២០២៥ វេលាម៉ោង២០ និង៣០នាទី នៅចំណុចហាងម៉ាស្សាយីហោ គីណេស ដែលមានទីតាំងនៅផ្ទះលេខ២២Z ផ្លូវលេខ៤២០ ក្រុមទី១៤ ភូមិ៤ សង្កាត់បឹងត្របែក ខណ្ឌចំការមន រាជធានីភ្នំពេញ មានអំពើឃា.តកម្មមួយ ដោយជនសង្ស័យម្នាក់ជាបុគ្គលិកហាងម៉ាស្សា បានប្រើកាំបិតចុងស្រួចចា.ក់ទៅលើបុគ្គលិកម្នាក់ទៀតជាច្រើនកាំបិត បណ្ដាលឲ្យរងរបួសយ៉ាងធ្ងន់ធ្ងរ និងស្លា.ប់បាត់បង់ជីវិតនៅពេលបញ្ជូនទៅដល់មន្ទីរពេទ្យ មិនតែប៉ុណ្ណោះជនសង្ស័យបានភ្ជង់គំរាមយកទូរស័ព្ទពីជនរងគ្រោះហើយគេចខ្លួនបាត់ ។

បន្ទាប់ពីទទួលបានព័ត៌មាននេះភ្លាម កម្លាំងការិយាល័យនគរបាលព្រហ្មទណ្ឌកម្រិតធ្ងន់ និងកម្រិតស្រាលរាជធានីភ្នំពេញ សហការជា មួយកម្លាំងអធិការដ្ឋាននគរបាលខណ្ឌចំការមនធ្វើការស្រាវជ្រាវយ៉ាងយកចិត្តទុកដាក់ រហូតដឹងថា ជនសង្ស័យបានទៅសម្ងំលាក់ខ្លួននៅស្រុកមុខកំពូល ខេត្តកណ្ដាល ជាស្រុកកំណើត ។

ដោយមានបញ្ជាដឹកនាំពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ក្រោមការសម្របសម្រួលពីលោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ កម្លាំងសមត្ថកិច្ចបានចុះទៅសហការជាមួយនគរបាលស្រុកមុខកំពូល ខេត្តណ្តាល ឃាត់ខ្លួនជនសង្ស័យ និងដកហូតសម្ភារវត្ថុតាងពាក់ព័ន្ធអំពើឃា.តកម្មមួយចំនួនផងដែរ ។

ចំពោះវត្ថុតាងទាំងនោះរួមមាន ៖ ទូរស័ព្ទដៃចំនួន០៥ គ្រឿង កាំបិតចុងស្រួចមានដងជ័រ ចំនួន០២ដើម ម៉ូតូ០១គ្រឿង ម៉ាកស៊ុយស៊ូគី វីវ៉ា ពណ៌ខៀវ ពាក់ផ្លាកលេខ បាត់ដំបង 1H-9760 .មួកសុវត្ថិភាព ចំនួន ០១ ។ ពេលចាប់ខ្លួនជនសង្ស័យបានឆ្លើយសារភាពនៅចំពោះមុខសមត្ថកិច្ចថា ខ្លួន និងជនរងគ្រោះឈ្មោះ ពៅ ជាមនុស្សស្គាល់គ្នា ហើយបានមកធ្វើការងារជាបុគ្គលិកម៉ាស្សា និងស្នាក់នៅជាមួយគ្នាទៀតផង ។

ជនសង្ស័យបានដាក់កាំបិតក្នុងកាតាបស្ពាយតាមខ្លួនជារៀងរាល់ថ្ងៃ ដើម្បីទុកកាពារខ្លួនពេលត្រឡប់ទៅផ្ទះវិញ ដែលកន្លងមកខ្លួនធ្លាប់មានទំនាស់ពាក្យសម្តីជាមួយជនរងគ្រោះ រឿងមិនទាក់ទងជួយរកការងារឲ្យធ្វើ ។ លុះនៅថ្ងៃកើតហេតុខ្លួនក៏បានយកកាំបិតចា.ក់ទៅលើជនរងគ្រោះជាច្រើនកាំបិត ដោយគំនុំគុំគួនជាមួយជនរងគ្រោះយូរមកហើយ មិនតែប៉ុណ្ណោះ ខ្លួនពិតជាបានយកកាំបិតភ្ជង់គំរាមកំហែងយកទូរស័ព្ទពីបុគ្គលិកធ្វើការជាមួយគ្នាទៀតផង ក្នុងគោលបំណងយកលុយ ដើម្បីបានចាយវាយ ។

ជនសង្ស័យសារភាពទៀតថា កន្លងមកខ្លួនធ្លាប់ចូលមណ្ឌលកែប្រែឱកាសខ្ញុំចំនួន០១លើក នៅអំឡុងឆ្នាំ២០២៤ ប៉ុន្តែមិនធ្លាប់ជាប់ពន្ធធនាគារទេ ។ ម្តងនេះបានភ្លក់រស់ជាតិហើយ អាចជាប់គុកមួយជីវិតពាក់ព័ន្ធប្រព្រឹត្តបទល្មើសក្នុងអំពើឃា.តកម្ម ។ ចំពោះជនសង្ស័យសមត្ថកិច្ច បានកសាងសំណុំរឿងតាមនីតិវិធី ៕

March 20, 2025

ព័ត៌មានជាតិ, សន្ដិសុខសង្គម
តម្លៃមាសអន្តរជាតិបន្តបំបែកកំណត់ត្រាថ្មី ៣,០៤២ដុល្លារក្នុង១អោន

អន្តរជាតិ ៖ ប្រភពពីទីភ្នាក់ងារសារព័ត៌មាន Reuters នៅរសៀលថ្ងៃទី១៩ ខែមីនា ឆ្នាំ២០២៥ បានរាយការណ៍ថា តម្លៃមាសអន្តរជាតិបានហក់ឡើងដល់កម្រិតខ្ពស់បំផុតមិនធ្លាប់មាន ដោយសារភាពតានតឹងនៅតំបន់មជ្ឈិមបូព៌ា និងភាពមិនច្បាស់លាស់ពាណិជ្ជកម្មពិភពលោក បានធ្វើឱ្យតម្រូវការមាសកើនឡើងឥតឈប់ឈរ។

តម្លៃមាសអន្តរជាតិស្ថិតក្នុងតម្លៃ ៣,០៣៤ដុល្លារក្នុង១អោន ឬ ៣,៦៥៥ដុល្លារក្នុង១តម្លឹង គិតត្រឹមរសៀលថ្ងៃទី១៩ ខែមីនា ឆ្នាំ២០២៥ បន្ទាប់ពីហក់ឡើងដល់កម្រិតខ្ពស់បំផុតគ្រប់ពេល ៣,០៤២ដុល្លារក្នុង១អោន នៅក្នុងការជួញដូរមុន ខណៈតម្លៃបានទម្លុះរនាំង ៣,០០០ដុល្លារក្នុង១អោនជាលើកដំបូង កាលពីថ្ងៃទី១៤ ខែមីនា ឆ្នាំ២០២៥។

លោក Tim Waterer ប្រធានអ្នកវិភាគទីផ្សារនៅឯក្រុមហ៊ុន KCM Trade បានថ្លែងថា «បណ្តាអ្នកជួញដូរកំពុងមើលមាសជាទ្រព្យសកម្មមានសុវត្ថិភាពបំផុត ដើម្បីដោះស្រាយភាពមិនប្រាកដប្រជាសេដ្ឋកិច្ចសកល ដែលជំរុញដោយសង្គ្រាមពន្ធ។ តាមរយៈភាពមិនប្រាកដប្រជាពាណិជ្ជកម្មពិភពលោក មាស គឺជារបាំងការពារដ៏រឹងមាំ»។

អ្នកវិនិយោគកំពុងតែមានការព្រួយបារម្ភកាន់តែខ្លាំងអំពីការធ្លាក់ចុះសេដ្ឋកិច្ច ដោយសារតែចំណាត់ការពន្ធរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ដែលត្រូវបានចាត់ទុកជាទូទៅថា អាចនឹងបង្កឱ្យមានអតិផរណា។ ចំណែកឯធនាគារកណ្តាលអាមេរិក ដែលនឹងបញ្ចប់កិច្ចប្រជុំគោលនយោបាយរយៈពេលពីរថ្ងៃរបស់ខ្លួន ត្រូវបានរំពឹងថានឹងរក្សាអត្រាការប្រាក់ឱ្យនៅឋិតឋេរក្នុងអត្រាពី ៤.២៥%-៤.៥០% ។

«មាស» គឺជារបាំងការពារដ៏រឹងមាំប្រឆាំងនឹងភាពមិនច្បាស់លាស់ភូមិសាស្ត្រនយោបាយ និងសេដ្ឋកិច្ចពិភពលោក ហើយតម្លៃលោហៈធាតុដ៏មានតម្លៃនេះ តែងតែងើបឡើងនៅក្នុងពេលមានអត្រាការប្រាក់ទាប។

កត្តាផ្សេងទៀត ដែលជំរុញឱ្យតម្លៃមាសកើនឡើងខ្ពស់បែបនេះ បន្ទាប់ពីការវាយប្រហារតាមផ្លូវអាកាសរបស់ប្រទេសអ៊ីស្រាអែលលើតំបន់ហ្គាហ្សា ដោយបានសម្លាប់មនុស្សជាង ៤០០នាក់កាលពីថ្ងៃអង្គារ ខណៈដែលអ៊ីស្រាអែលបានព្រមានថា ការវាយលុកលើកនេះ គ្រាន់តែជាការចាប់ផ្តើមតែប៉ុណ្ណោះ។

នាយករដ្ឋមន្ត្រីអ៊ីស្រាអែល លោក Benjamin Netanyahu បានថ្លែងថា លោកបានបញ្ជាឱ្យមានការវាយប្រហារ ដោយសារក្រុមហាម៉ាស់បានបដិសេធសំណើរ ដើម្បីទទួលបានការពន្យារពេលបទឈប់បាញ់។ លោកបានអំពាវនាវឱ្យប្រជាជននៅតំបន់ហ្គាហ្សាចេញពីទីតាំងគ្រោះថ្នាក់ ហើយផ្លាស់ទីទៅកាន់តំបន់មានសុវត្ថិភាពជាងមុន៕ ដកស្រង់ ៖ Reuters

March 20, 2025

ព័ត៌មានអន្តរជាតិ, ព្រឹត្តិការណ៍សំខាន់ៗ
រាជរដ្ឋាភិបាល នឹងពិនិត្យឡើងវិញ ដើម្បីពង្រឹង និងកែលម្អរចនាសម្ព័ន្ធប្រព័ន្ធអភិបាលកិច្ចនៅរដ្ឋបាលថ្នាក់ក្រោមជាតិ

រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសគាំទ្រទាំងស្រុង លើការពិនិត្យឡើងវិញ ដើម្បីពង្រឹង និងកែលម្អ រចនាសម្ព័ន្ធ ប្រព័ន្ធអភិបាលកិច្ច នៅរដ្ឋបាលថ្នាក់ក្រោមជាតិ ឱ្យស្របតាមគោលការណ៍ នៃរដ្ឋបាលឯកភាព ដែលបានកំណត់ក្នុងច្បាប់ ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ។

ការប្រកាសគាំទ្ររបស់ប្រមុខរាជរដ្ឋាភិបាល បន្ទាប់ពីមានសំណើរពីឯកឧត្តម ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។

ថ្លែងក្នុងឱកាសបិទវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ស្តីពី “កំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជាឆ្នាំ២០៥០” នៅថ្ងៃទី១៨ ខែមីនា ឆ្នាំ២០២៥ នៅសណ្ឋាគារសុខាភ្នំពេញ សម្តេចបវរធិបតី ហ៊ុន ម៉ាណែត ចាត់ទុកថា ការពិនិត្យឡើងវិញ ដើម្បីពង្រឹង និងកែលម្អ រចនាសម្ព័ន្ធ ប្រព័ន្ធអភិបាលកិច្ច នៅរដ្ឋបាលថ្នាក់ ក្រោមជាតិ គឺដើម្បីធានាឱ្យក្រុមប្រឹក្សាអាចម្ចាស់ ការលើកិច្ចការងារគ្រប់គ្រងមុខងារ ធនធាន និងមានសមត្ថភាពដឹកនាំសម្របសម្រួល សកម្មភាព ផ្តល់សេវាសាធារណៈ និងការអភិវឌ្ឍនៅក្នុងដែនរបស់ខ្លួន សំដៅឆ្លើយតប ទៅនឹងតម្រូវការរបស់ប្រជាពលរដ្ឋ នៅតាមមូលដ្ឋាន ឱ្យកាន់តែមានប្រសិទ្ធភាព ។

សម្តេចបវរធិបតីនាយករដ្ឋមន្ត្រី មានប្រសាសន៍យ៉ាងដូច្នេះថា ៖ “ជាការពិតផ្អែកតាម ការវិវឌ្ឍយ៉ាងឆាប់រហ័ស ទាំងផ្នែកសេដ្ឋកិច្ច នគរូបនីយកម្ម បច្ចេកវិទ្យាព័ត៌មាន ការបំលាស់ទី របស់ប្រជាជន មកកាន់តំបន់ទីប្រជុំជន ការកើនឡើងនូវតម្រូវការសង្គម និងសម្ពាធនៃវិបត្តិ ជាសកល បានតម្រូវឱ្យរាជរដ្ឋាភិបាល ចាំបាច់ត្រូវពិនិត្យ និងកែលម្អស្ថាប័នរដ្ឋបាលសាធារណៈ ទាំងនៅថ្នាក់ជាតិ និងនៅក្រោមជាតិ” ។

បន្ថែមលើនេះ សម្តេចបវរធិបតី ហ៊ុន ម៉ាណែត ក៏គូសបញ្ជាក់ថា ចំពោះការកែលម្អ ស្ថាប័នសាធារណៈ រដ្ឋបាលថ្នាក់ក្រោមជាតិ រាជរដ្ឋាភិបាល បានផ្តល់ជាផែនទីបង្ហាញផ្លូវ នៅក្នុងកម្ម វិធីជាតិដំណាក់កាលទី២ រួចហើយ គឺត្រូវបន្តរៀបចំរចនាសម្ព័ន្ធ គ្រប់គ្រង និងមុខងាររដ្ឋបាល ថ្នាក់ក្រោមជាតិ ៕

March 20, 2025

ព័ត៌មានជាតិ
ក្រសួងបរិស្ថាន៖ គុណភាពខ្យល់នៅកម្ពុជា ចាប់ពីម៉ោង៦ល្ងាចសម្រាប់ថ្ងៃទី១៤ ខែមីនា ដល់ម៉ោង៦ព្រឹក ថ្ងៃទី១៥ ខែមីនា គឺ «ល្អណាស់»

(ភ្នំពេញ)៖ ក្រសួងបរិស្ថាន ជូនដំណឹងអំពីស្ថានភាពគុណភាពខ្យល់ នៅក្នុងព្រះរាជាណាចក្រកម្ពុជា សម្រាប់ថ្ងៃទី១៤ ខែមីនា ឆ្នាំ២០២៥ ចាប់ពីម៉ោង ៦ល្ងាច ដល់ម៉ោង ៦ព្រឹក ថ្ងៃទី១៥ ខែមីនា ឆ្នាំ២០២៥ ដែលមានកំហាប់ភាគល្អិតនិចលគិតជាមធ្យមស្មើនឹង២៥.១៦ µg/m3 ធៀបនឹងស្តង់ដារ ៥០ ug/m3 និងគិតជាសន្ទស្សន៍គុណភាពខ្យល់ (Air Quality Index) គឺ «ល្អណាស់»។

ពណ៌ខៀវៈ គុណភាពខ្យល់ល្អណាស់មានខេត្តកំពង់ឆ្នាំង ខេត្តព្រៃវែង ខេត្តកែប ខេត្តក្រចេះ ខេត្តមណ្ឌលគីរី ខេត្តត្បូងឃ្មុំ ខេត្តកំពត ខេត្តកំពង់ចាម ខេត្តស្វាយរៀង ខេត្តកោះកុង ខេត្តព្រះសីហនុ ខេត្តតាកែវ រាជធានីភ្នំពេញ ខេត្តរតនគិរី និងខេត្តឧត្តរមានជ័យ, ពណ៌បៃតងៈ គុណភាពខ្យល់ល្អមានខេត្តបន្ទាយមានជ័យ ខេត្តបាត់ដំបង ខេត្តកំពង់ស្ពឺ ខេត្តកំពង់ធំ ខេត្តកណ្តាល ខេត្តព្រះវិហារ ខេត្តពោធិ៍សាត់ ខេត្តស្ទឹងត្រែង ខេត្តប៉ៃលិន និងខេត្តសៀមរាប៕

March 15, 2025

ព័ត៌មានជាតិ