រាជធានីភ្នំពេញ ៖ បុរសជនជាតិចិនម្នាក់បានទំនាស់ពាក្យសំដីរឿងឆាតហៅនារីម្នាក់ តែពេលនាងមកជួបមុខផ្ទាល់ បែរជានារីភេទទី៣ ក៏ធ្វើ​ឱ្យ​បុរសជនជាតិចិននោះខឹងយ៉ាងខ្លាំង ក៏បានប្រើហិង្សាទះ និង​វាយនារីជា​ភេទទី៣ច្រើនដៃ ​បង្កការភ្ញាក់ផ្អើលដល់ប្រជាពលរដ្ឋជួយអន្តរាគមន៍និងទូរស័ព្ទប្ដឹងសមត្ថកិច្ចចាប់បុរសជនជាតិចិននោះយកទៅប៉ុស្តិ៍ ហើយនារីភេទទី៣បានទៅដាក់ពាក្យបណ្ដឹង ដើម្បីចាត់ការតាមផ្លូវច្បាប់ពាក់ព័ន្ធករណីបង្កហិង្សាមានចេតនា ។

ហេតុការណ៍ខាងលើនេះ​បង្កការភ្ញាក់ផ្អើល​កើតឡើងកាលពីវេលាម៉ោង៥និង៤០នាទីព្រឹកថ្ងៃទី២១ ខែ មេសា ឆ្នាំ ២០២៥នៅចំណុចមុខផ្សារចិន តាមផ្លូវ៧៨ ស្ថិតភូមិ១៤ សង្កាត់ ទន្លេបាសាក់ ខណ្ឌចំការមន រាជធានីភ្នំពេញ ។

តាមប្រភពពីប្រជាពលរដ្ឋបាន​​ឱ្យដឹងថា មុនពេលកើតហេតុ មានបុរសជនជាតិចិនម្នាក់បានឆាតហៅនារីម្នាក់តាមតេឡេក្រាម តែមិនដឹងហៅមករឿងអ្វីនោះទេ ។ ស្រាប់តែនារីដែលមកតាមឆាត​មកឈប់មុខផ្សារចិន ក៏ឃើញជា​នារីភេទទី៣ទៅវិញ ទើបកើតជាទំនាស់រវាងនារីភេទទី៣ និងបុរសជនជាតិចិនវ័យប្រហែល៣០ឆ្នាំ ដោយបុរសរូបនោះបានប្រើហិង្សាទះនិងដេញ​វាយនារី​ភេទ​ទី៣ មុខផ្សារចិនជា​ច្រើនដៃ ទើបប្រជាពលរដ្ឋជាអ្នករត់ម៉ូតូកង់បី និងអ្នកដំណើរផ្សេងទៀត​នាំគ្នាស្រែកផ្អើលឆោឡោ និងខ្លះជួយតេទូរស័ព្ទប្ដឹងសមត្ថកិច្ចអោយចុះមកជួយអន្តរាគមន៍ ។

ភ្លាមៗនោះ សមត្ថកិច្ច​បាន​ចុះអន្តរាគមន៍យកភាគីសងខាងមកប៉ុស្តិ៍ ទាំងអ្នកបង្កហិង្សាជា​បុរសជនជាតិចិន និងនារីភេទទី៣មកសាកសួរនាំ ដើម្បីសុំគោលការណ៍ថ្នាក់លើឃាត់ខ្លួនចាត់ការតាមផ្លូវច្បាប់ ។

បច្ចុប្បន្ននារីភេទទី៣ បានដាក់ពាក្យបណ្ដឹងអោយសមត្ថកិច្ចចាត់ការតាមផ្លូវច្បាប់ពាក់ព័ន្ធប្រើអំពើហិង្សា បណ្ដាលឱ្យ​​នាងពកក្បាល និងវិលមុខយ៉ាងខ្លាំងដោយសារជនបង្កប្រើកំលាំងដៃខ្លាំង​វាយមកលើរូប​នាង​ ៕

ខេត្តស្វាយរៀង ​៖ ​ជនសង្ស័យ​ជា​ឃាតករ​កាប់​ប្រហារ​​ជនរងគ្រោះម្នាក់ បណ្តាលឱ្យស្លាប់ ​ត្រូវ​សមត្ថកិច្ច​ចាប់ខ្លួន​បាន​ហើយ រួច​បញ្ជូន​មក​ការិយាល័យ​នគ​បាល​ព្រហ្ម​ទ័ណ្ឌស្នងការ​នគ​បាល​ខេត្តស្វាយរៀង​ចាត់ការ​តាម​នីតិវិធី​។​ គួររំលឹកថា កំពុង​តែ​អង្គុយ​និយាយ​គ្នា​លេង​នឹង​អ្នក​ជិតខាង ស្រាប់តែ​បុរស​ម្នាក់​ដើរមក​កា​.​ប់រ​ហូត​ដល់​ស្លា​.​ប់​ភ្ញាក់ផ្អើល​នៅ​ស្រុក​រមាស​ហែក

ជនសង្ស័យ​ឈ្មោះ​មឿង ធា​រ៉ា ភេទ​ប្រុស​អាយុ​៣៨​ឆ្នាំ មាន​ស្រុ​កំណើត​នៅ​ភូមិ​ព្រៃ​សង្គម​ឃុំ​ច្រេស​ស្រុក​មេ​សាង​ ត្រូវ​សមត្ថកិច្ច​ចាប់ខ្លួន​បាន​នា​ព្រឹក​ថ្ងៃ​ទី​២០​ មេ​សា ឆ្នាំ​​២០២៥ ​នៅ​ស្រុក​មេ​សាង​ខេត្តព្រៃវែង​។

​សូម​រំលឹក​ផង​ដែរ​មាន​ករណី​អំពើ​ឃាត្តកម្ម​ដ៏​សាហាវ ដោយ​បុរស​ម្នាក់​មិនដឹង​មាន​គុំនុំ​អ្វី​បាន​កាន់​ពូថៅ​ចូល​មក​កាប់​ប្រហារ​ជន​រង​គ្រោះ​ចំ​ក្បាល​ពីក្រោយ​ជា​ច្រើន​ពូថៅ​បណ្តាល​ឲ្យ​ផុង​លលា​ដ៏​ស្លាប់​ភ្លាម​ៗ​នៅ​ក្នុង​ថ្លុកឈាម​។

​ករណី​ដ៏​រន្ធត់​នេះ​បាន​កើតឡើង​នៅ​វេលា​ម៉ោង​១១​និង​០០​នាទី​យប់​ថ្ងៃ​ទី​១៨​មេ​សា​២០២៥​ស្ថិត​នៅ​ភូមិ​ព្រៃ​សត្វ ឃុំ​សម្បត្តិ​មាន​ជ័យ​ស្រុក​រមាស​ហែក​បណ្តាល​ឲ្យ​ស្លាប់​នៅ​ក្នុង​វង់​មនុស្ស​យ៉ាង​រន្ធត់​ផ្អើល​ឆោឡោ​ភ័យ​ញាក់សាច់​។​

បើ​តាម​ប្រជាពលរដ្ឋ​បាន​ឲ្យ​ដឹង​ថា មុន​ពេល​កើតហេតុ ជន​រង​គ្រោះ​កំពុង​អង្គុយ​ជជែក​គ្នា​លេង​ក្នុង​វង់​ផឹកស៊ី នៅ​លើ​គ្រែ​ក្នុង​រោង​ខាង​មុខ​ផ្ទះ​របស់​បងប្រុស​ជាមួយ​អ្នក​ជិតខាង ស្រាប់តែ​ជនសង្ស័យ​ដើរ​ចូល​មក​ទាញ​ពូថៅ​កាប់​ប្រហារ​ទៅ​លើ​ជន​រង​គ្រោះ​យ៉ាង​រន្ថើន​ជា​ច្រើន​ពូថៅ ហើយ​មួយ​ពូថៅ​ចំ​ក្បាល​ពីក្រោយ​ផុង​លលា​ដ៏ ហូរ​ឈាម​ដូច​គេ​ចាក់ក​ជ្រូក​បណ្តាល​ឲ្យ​ស្លាប់​ភ្លាម​ៗ​នៅ​និង​កន្លែង​យ៉ាង​រន្ធត់​ចំណែក​មនុស្ស​០៥​នាក់​អង្គុយ​ជាមួយ​ស្ទុះ​រត់​យក​ព្រះ​អាយុ​រៀង​ៗ​ខ្លួន​។​

បើ​តាម​សមត្ថកិច្ច​បាន​ឲ្យ​ដឹង​ថា​ជន​រង​គ្រោះ​ឈ្មោះ​ឌី​ម វ​ណ្ណី ភេទ​ប្រុស​អាយុ ៤៧​ឆ្នាំ មុខរបរ​ធ្វើស្រែ មាន​ទីលំនៅ​ភូមិ​ព្រៃ​សត្វ​ឃុំ​សម្បត្តិ​មាន​ជ័យ​ស្រុក​រមាស​ហែក​។​

ប្រភព​បន្ត​ថា កាលពី​ថ្ងៃ​វេលា​ម៉ោង​១២​ថ្ងៃត្រង់​នៅផ្ទះ​កើតហេតុ ត្រូវជា​បងប្រុស​របស់​ជន​រង​គ្រោះ​បាន​ជួបជុំ​ផឹកស៊ី ជាមួយ​អ្នក​ជិតខាង ៦​ទៅ​៧​នាក់​រហូត​ដល់​យប់ ក៏​ឈប់​ផឹកស៊ី ចំណែក​ម្ចាស់ផ្ទះ​ស្រវឹង​ក៏​ឡើង​ទៅ​ដេក​នៅ​តែ​ភ្ញៀវ​នាំ​គ្នា​អង្គុយ​ជជែក​គ្នា​លេង​បន្ត​ចំណែក​ជន​រង​គ្រោះ ត្រូវជា​ប្អូន​ម្ចាស់ផ្ទះ​ក៏​អង្គុយ​លេង​កំដរ​ភ្ញៀវ រហូត​ដល់​ម៉ោង​១១​យប់ ស្រាប់​ជនសង្ស័យ​ឈ្មោះ​មឿង ធា​រ៉ា ភេទ​ប្រុស​អាយុ​៣៨​ឆ្នាំ (​មានជំងឺសរសៃប្រសាទ​ )​នៅ​ភូមិ​ព្រៃ​សង្គម​ឃុំ​ច្រេស ស្រុក​មេ​សាង​ខេត្តព្រៃវែង​ដើរ​ចូល​មក​ទាញ​ពូថៅ​វាយ​ជន​រង​គ្រោះ​ពីក្រោយ​១​ពូថៅ​បណ្តាល​ឲ្យ​ដួល​រួច​កាប់​យ៉ាង​រន្ថើន​ជា​ច្រើន​ពូថៅ ១​ពូថៅ​ចំ​ក្បាល​ពីក្រោយ​បណ្តាល​ឲ្យ​ផុង​លលា​ដ៏​ក្បាល​ស្លាប់​ភ្លាម​ៗ​នៅ​ក្នុង​ថ្លុកឈាម​តែ​ម្តង​ ​បង្ក​ឲ្យ​អ្នក​អង្គុយ​ជាមួយ​ចំនួន​០៥​នាក់​ភ័យ​ស្លន់ស្លោ​រត់គេច​ខ្លួន​យក​ព្រះ​អាយុ​រៀង​ៗ​ខ្លួន រួច​ឆោឡោ​ប្តឹង​សមត្ថកិច្ច​ឲ្យ​ជួយ​អន្តរាគមន៍​។​ចំណែក​ជនសង្ស័យ​ក្រោយ​ពី​ធ្វើ​សកម្មភាព​រួច​បាន​រត់គេច​ខ្លួន​បាត់​ស្រមោល​ភ្លាម​ៗ​ដែរ​។

តាមប្រភព​បន្ត​ថា ជនសង្ស័យ មាន​ជម្ងឺ សរសៃ​ប្រសា​ទជាង​១០​ឆ្នាំ​មក​ហើយ​ក៏​ប៉ុន្តែ​គ្មាន​សំបុត្រ​បញ្ជាក់​ពី​គ្រូពេទ្យ​ទេ ​​ជននេះ​​មានអការៈ​ស្ទើ​ឆ្កួត​ស្ទើ​ជា ត្រូវ​ប្រពន្ធ​លែងលះ​ហើយ​ទៅ​រស់នៅ​ក្នុង​វត្ត​នៅ​ស្រុក​មេ​សាង​ខេត្តព្រៃវែង ។​

ជនសង្ស័យ​មាន​ប្រពន្ធ​កូន​នៅ​ភូមិ​កើតហេតុ​ខាងលើ ក្រោយ​ពី​ប្រពន្ធ​លែង​មក​ជនសង្ស័យ​ចេញ​ទៅ​នៅ​ឯ​ស្រុក​កំណើត ហើយ​បាន​ចេញចូល​មក​រក​បងប្រុស​នៅ​ក្នុងភូមិ​កើតហេតុ ហើយ​បាន​បាត់​ខាន​ចេញចូល​យូ​ឆ្នាំ​ហើយ​ទើបតែ​ឃើញ​ជនសង្ស័យ​ចូល​មក​ភូមិ​កើតហេតុ​កាលពី​វេលា​ម៉ោង​២​និង​០០​នាទី​រសៀល​ថ្ងៃ​ទី​១៨​មេ​សា នេះ​ដើរ​ចូល​មក​កន្លែង​ជន​រង​គ្រោះ​ផឹកស៊ី ដោយ​មិន​និយាយ​ស្តី​អី​ទេ ហើយ​ក៏​ដើរ​ចេញ​ទៅ​វិញ​បាត់​ទៅ ស្រាប់តែ​ដល់​ម៉ោង​១១​យប់​ត្រឡប់​មក​វិញ​ចូល​កាប់​ប្រហារ​ជន​រង​គ្រោះ​តែ​ម្តង​។​

ក្រោយ​ពី​សមត្ថកិច្ច​ធ្វើ​កោសល្យ​វិ​ច្ច័​យ​រួច​សមត្ថកិច្ច​បាន​ប្រគល់​ឲ្យ​ក្រុម​គ្រួសារ​យក​ទៅ​ធ្វើបុណ្យ​តាម​ប្រពៃណី​។​បច្ចុប្បន្ន​សមត្ថកិច្ច​កំពុង​តាម​ស្រាវជ្រាវ​រក​ចាប់ខ្លួន​ជនសង្ស័យ​មក​ផ្តន្ទាទោស​តាម​ច្បាប់​៕​

លោក​ត្រាំ កាន់តែ​ដំឡើង​សាច់ដុំ​ពន្ធ​របស់​អា​មេ​រិ​ក​ប្រឆាំង​នឹង​ប្រទេស​ចិន​ហើយ បន្ទាប់​ពី​លោក​បាន​គំរាម​ថា នឹង​ដាក់​ពន្ធ​ចំនួន​៥០​ភាគរយ​បន្ថែម​ទៀត​លើ​ទំនិញ​ចិន ដែល​ចូល​ទីផ្សារ​អា​មេ​រិ​ក ។

យោង​តាម​សេចក្តីរាយការណ៍​ព័ត៌មាន​របស់ BBC បានអោយ​ដឹង​នៅ​ព្រឹក​ថ្ងៃ​អង្គារ​នេះ​ថា លោក ត្រាំ គំរាម​បែប​ប​នេះ បន្ទាប់​ពី​ចិន​ដាក់​ពន្ធ​៣៤​ភាគរយ​ជា​ការ​ឆ្លើយ​តប​ចំពោះ​អា​មេ​រិ​ក​នឹង​ការ​ប្រកាស​របស់​លោក​ត្រាំ កាលពី​ស​ប្តា​ហ៍​មុន​ដាក់​ពន្ធ​៣៤​ភាគរយ​លើ​ទំនិញ​របស់​ចិន ។

បើសិនជា​លោក​ត្រាំ សម្រេច​ដាក់​ពន្ធ​បន្ថែម​៥០​ភាគរយ​ទៀត​មែន​នោះ​វា​នឹង​ធ្វើ​អោយ​ពន្ធ​លើ​ទំនិញ​របស់​ចិន ឡើង​ដល់​១០៤​ភាគរយ ពីព្រោះ​អា​មេ​រិ​កបាន​ដំឡើង​ពន្ធ​៣៤​ភាគរយ ទៅ​លើ​ពន្ធ​២០​ភាគរយ លើ​ទំនិញ​ចិន កាលពី​ខែមីនា ។

បើសិនជា​លោក​ត្រាំ ដាក់​ពន្ធ​បន្ថែម​៥០​ភាគរយ​ទៀត​មែន​នោះ ចិន​ក៏​ទំនងជា​មិន​នៅ​ស្ងៀម អោយ​អា​មេ​រិ​ក​ធ្វើបាប​ស្រេច​ចិត្ត​ដែរ ។ ចិន​ក៏​ទំនងជា​នឹង​សាង​សឹក​វិញ​ដូច​អ្វី​ដែល​ចិន​បាន​ប្រតិកម្ម​កន្លង​មក ៕

រាជធានី​ភ្នំពេញ ៖ សុខ​សន្តិភាព​ដែល​រកបាន​ដោយ​សម្តេច​តេ​ជោ ហ៊ុន សែន និង​បន្ត​ថែទាំ​យ៉ាង​រឹង​មាំ ដោយ​សម្តេច​មហា​បវរ​ធិ​បតី ហ៊ុន ម៉ា​ណែ​ត បាន​នាំ​មក​នូវ​មនុញ្ញផល និង​សមិទ្ធផល​ជា​ឧត្តម​ប្រយោជន៍​សម្រាប់​ជាតិ និង​ប្រជាជន​កម្ពុជា​ជា​ហូរហែ ។

នៅ​ព្រឹក​ថ្ងៃ​ទី​៧ ខែមេសា ឆ្នាំ​២០២៥​នេះ សមិទ្ធផល​ថ្មី​មួយទៀត​ហើយ​លើ​ដី​រាជធានី​ភ្នំពេញ ត្រូវ​បាន​រៀបចំ​សម្ពោធ​ដាក់​ឱ្យ​ប្រើប្រាស់ គឺ​ស្ពាន​អាកាស​«​មរតក​តេ​ជោ​» ដែល​ជា​ស្ពាន​អាកាស​ទី​៨ ក្នុង​រាជធានី​ភ្នំពេញ ។

ពិធី​សម្ពោធ​សមិទ្ធផល​ថ្មី​រាជធានី​ភ្នំពេញ ដែល​ជា​មរតក​របស់​សម្តេច​តេ​ជោ ហ៊ុន សែន ត្រូវ​បាន​ប្រព្រឹត្ត​ទៅ​ក្រោម​អធិបតីភាព​ដ៏​ខ្ពង់ខ្ពស់​របស់​សម្តេច​មហា​បវរ​ធិ​បតី ហ៊ុន ម៉ា​ណែ​ត នាយក​រដ្ឋមន្ត្រី​កម្ពុជា ។ ស្ពាន​អាកាស​មរតក​តេ​ជោ ស្ថិត​នៅ​ចំណុចប្រសព្វ​រវាង​ខណ្ឌចំការមន និង​ខណ្ឌមានជ័យ រាជធានី​ភ្នំពេញ ត្រូវ​បាន​បើក​ការដ្ឋាន​សាងសង់​កាលពី​ថ្ងៃ​ទី​៣១ ខែសីហា ឆ្នាំ​២០២២ ក្រោម​អធិបតីភាព​សម្តេច​តេ​ជោ ហ៊ុន សែន អតីត​នាយក​រដ្ឋមន្ត្រី និង​ជា​ប្រធាន​ព្រឹទ្ធសភា​នា​ពេល​បច្ចុប្បន្ន ។

តាម​ការ​គ្រោងទុក ស្ពាន​អាកាស​នេះ ត្រូវ​ប្រើ​រយៈពេល​សាងសង់​ចំនួន ៣៦​ខែ ប៉ុន្តែ​ជាក់ស្តែង​អាស្រ័យ​ដោយ​មានការ​ខិតខំ​ប្រឹងប្រែង​ស្ថាបនា​ទាំងថ្ងៃទាំងយប់ ធ្វើ​ឱ្យ​ការដ្ឋាន​នេះ​ប្រើ​រយៈពេល​សាងសង់​ត្រឹមតែ ៣០​ខែ​ប៉ុណ្ណោះ ។

ក្នុង​នោះ ដោយ​មាន​គោលការណ៍​អនុញ្ញាត​ពី​សម្ដេច​មហា​បវរ​ធិ​បតី​នាយក​រដ្ឋមន្ត្រី រដ្ឋបាល​រាជធានី​ភ្នំពេញ​បាន​ដាក់​ឱ្យ​ប្រជាពលរដ្ឋ និង​អ្នកដំណើរ​បាន​ប្រើប្រាស់​ជា​បណ្តោះអាសន្ន នូវ​សំណង់​ហេដ្ឋារចនាសម្ព័ន្ធ រូប​វន្ត​ក្នុង​គម្រោង ដែល​បាន​ស្ថាបនា​រួច​ជា​បន្តបន្ទាប់ រួម​មាន ៖ លើក​ទី​១ ដាក់​ឱ្យ​ប្រើប្រាស់​ជា​បណ្ដោះអាសន្ន​នូវ​ស្ពាន​អាកាស​ជាន់​ទី​២ កាលពី​ថ្ងៃ​ទី​១ ខែមេសា ឆ្នាំ​២០២៤ និង​លើក​ទី​២ ស្ពាន​អាកាស​ជាន់​ទី​១ កាលពី​ថ្ងៃ​ទី​២៥ ខែធ្នូ ឆ្នាំ​២០២៤ ។

ស្ពាន​អាកាស​មរតក​តេ​ជោ បាន​ចំណាយ​ថវិកា​សាងសង់​អស់​ចំនួន ៣៦ ៧៧៥ ០០០​ដុល្លារ ជា​កញ្ចប់​ថវិកា​បាន​ពី​មូលនិធិ​អភិវឌ្ឍ​កោះន​រា និង​ថវិកា​មួយ​ផ្នែក​ដែល​នៅ​សល់​ពី​ការ​អនុវត្ត​គម្រោង​សាងសង់​ស្ពាន​អាកាស​ក្បាលថ្នល់ ដំណាក់កាល​ទី​២ ។ ស្ពាន​នេះ គឺជា​ស្ពាន​អាកាស​ទី​១ ដែល​ត្រូវ​សម្ពោធ​ដាក់​ឱ្យ​ប្រើប្រាស់​ជា​ផ្លូវការ​ក្នុង​អាណត្តិ​រាជរដ្ឋាភិបាល នីតិកាល​ទី​៧ នៃ​រដ្ឋសភា ។

ស្ពាន​អាកាស​មរតក​តេ​ជោ ជា​ស្ពាន​អាកាស​មាន​កម្ពស់​២​ជាន់ និង​មាន​ផ្លូវ​ខ្វាត់ខ្វែង​ច្រើន​ជាងគេ បើ​ធៀប​នឹង​ស្ពាន​អាកាស​ចំនួន​៧ ដែល​ដាក់​ឱ្យ​ប្រើប្រាស់​រួច​ហើយ​នោះ ។

សូម​បញ្ជាក់​ថា រាជធានី​ភ្នំពេញ ដែល​ធ្លាប់​បាន​គេ​ប្រសិទ្ធ​នាម​ជាទី​ក្រុង​ខ្មោច​ក្នុង​របប​ខ្មែរក្រហម​នោះ បាន​ក្លាយជា​មជ្ឈមណ្ឌល​សេដ្ឋកិច្ច ទេសចរណ៍ និង​វប្បធម៌ ដ៏​រស់​រវើក​នា​ពេល​បច្ចុប្បន្ន ក្រោម​ម្លប់​នៃ​សុខ​សន្តិភាព កើត​ចេញពី​នយោបាយ​ឈ្នះ​=​ឈ្នះ របស់​សម្តេច​តេ​ជោ ហ៊ុន សែន ។ រាជធានី​ភ្នំពេញ ទទួល​បាន​កំណើន​ប្រជាពលរដ្ឋ និង​ការ​ធ្វើ​ចរាចរណ៍​យ៉ាង​ឆាប់រហ័ស​បំផុត ។

កំណើន​ប្រជាពលរដ្ឋ និង​ការ​ធ្វើ​ចរាចរណ៍ ធ្វើ​ឱ្យ​រាជធានី​ភ្នំពេញ​ជួប​ការ​កកស្ទះ​ចរាចរណ៍​ខ្លាំង ជា​ពិសេស​ចំណុច​ផ្លូវ​ប្រសព្វ ។ ដើម្បី​ដោះស្រាយ​ការ​កកស្ទះ​នេះ រាជរដ្ឋាភិបាល​កម្ពុជា​ដឹកនាំ​ដោយ​សម្តេច​តេ​ជោ ហ៊ុន សែន ក្នុង​នីតិកាល​កន្លង​ទៅ បាន​សាងសង់​ស្ពាន​អាកាស​ជា​បន្តបន្ទាប់ ។

មក​ដល់​ពេល​បច្ចុប្បន្ន ស្ពាន​អាកាស​ចំនួន​៨​ហើយ​ក្នុង​រាជធានី​ភ្នំពេញ ត្រូវ​បាន​សាងសង់​រួចរាល់ និង​ដាក់​ឱ្យ​ប្រើប្រាស់ ។ ស្ពាន​អាកាស​ទាំង​៨​រួម​មាន​៖ ស្ពាន​អាកាស​ក្បាលថ្នល់​(២៤ មិថុនា ២០១០) ស្ពាន​អាកាស​៧​មក​រា​(៦ មក​រា ២០១២) ស្ពាន​អាកាស​ស្ទឹង​មាន​ជ័យ​(៣១ កក្កដា ២០១៤) ស្ពាន​អាកាស​៥​មក​រា​(៥ មក​រា ២០១៦) ស្ពាន​អាកាស​មិត្តភាព​កម្ពុជា​-​ចិន សែន​សុខ ឬ​ហៅ​ថា​«​ស្ពាន​អាកាស​ផ្សារ​ដី​ហ៊ុយ​»(២ កក្កដា ២០១៨) ស្ពាន​អាកាស​រង្វង់​មូល​ចោម​ចៅ​(៣១ មីនា ២០២២) ស្ពាន​អាកាស​ឫស្សី​កែវ ស្ថិត​លើ​ផ្លូវជាតិ​លេខ​៥(៣១ ខែឧសភា ឆ្នាំ​២០២៣) និង​ស្ពាន​អាកាស​មរតក​តេ​ជោ សម្ពោធ​ដាក់​ឱ្យ​ប្រើប្រាស់​នា​ព្រឹក​ថ្ងៃ​ចន្ទ ទី​៧ ខែមេសា ឆ្នាំ​២០២៥ ។

ក្រៅពី​ស្ពាន​អាកាស​ទាំង​៨​នេះ បច្ចុប្បន្ន​រដ្ឋបាល​រាជធានី​ភ្នំពេញ ក៏​កំពុង​សាងសង់​ស្ពាន​អាកាស​ភ្លោះ ស្ថិត​នៅ​ចំណុចប្រសព្វ​មហាវិថី​សម្តេច​តេ​ជោ ហ៊ុន សែន និង​ផ្លូវជាតិ​លេខ​២ ព្រំប្រទល់​រវាង​រាជធានី​ភ្នំពេញ និង​ខេត្តកណ្តាល ។ ស្ពាន​អាកាស​ភ្លោះ​តម្លៃ​ជាង ១៦​លាន​ដុល្លារ​នេះ ត្រូវ​បាន​បើក​ការដ្ឋាន​សាងសង់​ដោយ​សម្តេច​មហា​បវរ​ធិ​បតី កាលពី​ថ្ងៃ​ទី​១៧ ខែមិថុនា ឆ្នាំ​២០២៤ ហើយ​គ្រោង​បញ្ចប់​ការ​សាងសង់​ក្នុង​ពេល​ឆាប់​ៗ​ខាង​មុខ​នេះ ៕

ខេត្ត​ព្រះ​សីហ​នុ​ ៖ តាម​ប្រភព​ពី​សមត្ថកិច្ច បាន​ឲ្យ​ដឹង​ថា ផ្ទះ​ប្រជាពលរដ្ឋ​ចំនួន​​២​ខ្នង ​ត្រូវ​បានអគ្គិភ័យ​ឆាបឆេះ​អស់ស្ទើរ​ទាំងស្រុង ​នៅ​វេលា​ម៉ោង២និង៥០នាទី​រសៀល​ថ្ងៃទី២ មេសា ឆ្នាំ២០២៥ មាន​ករណី​អគ្គិភ័យ​ឆេះ​ផ្ទះ​២​ខ្នង ស្ថិត​នៅ​ចំណុច​ក្រុម​១៥ ភូមិ​១ សង្កាត់​លេខ​៤ ក្រុង​ព្រះសីហនុ ខេត្ត​ព្រះ​សីហ​នុ ។

តាមប្រភពដដែលបានបន្តថា ផ្ទះ​រងគ្រោះទី១-ម្ចាស់ឈ្មោះ អ៊ួ​ង ស្រី​នី ភេទ​ស្រី អាយុ​៤៦ឆ្នាំ មុខរបរលក់​កាហ្វេ​ ជា​ប្រភេទ​សំណង់ផ្ទះ​សង់​អំពី​ថ្ម​ក្រោម ដំបូល​ប្រក់ស​ង្ក័​សី​មាន​កម្ពស់​១​ជាន់​ ​ទំហំ​ទទឹង​៨​ម៉ែត្រ​​គុណនឹង​បណ្ដោយ​១២​ម៉ែត្រ​ និងផ្ទះ​សង់​អំពី​ឈើ​ជាន់​ផ្ទាល់​ដី​មានទំហំ​ទទឹង​៤​ម៉ែត្រ​គុណនឹង​បណ្ដោយ​៦ម៉ែត្រ​ ព្រមទាំង​សម្ភារៈ​ប្រើប្រាស់​ក្នុងផ្ទះ​ ត្រូវភ្លើងឆេះអស់ទាំង​ស្រុង​ ​។ ចំណែកផ្ទះរងគ្រោះទី២-ម្ចាស់​ឈ្មោះ ត្រង ចំរើន ភេទ ប្រុស អាយុ​៣៤​ឆ្នាំ មុន​របររត់​កង់​បី ផ្ទះមានទំហំ៨​ម៉ែត្រ​គុណនឹង​១២​ម៉ែត្រ​ ព្រមទាំង​សម្ភាៈ​ប្រើប្រាស់​ក្នុងផ្ទះ​ត្រូវភ្លើងឆេះអស់ទាំង​ស្រុង​។

ចំពោះមូលហេតុ ដែលបង្កឱ្យមានអគ្គិភ័យខាងលើ មិនទាន់ដឹងនៅឡើយទេ ខណៈ​កំពុង​ស្រាវជ្រាវ​ ។

ករណី​អគ្គិភ័យ​ខាងលើ​បាន​ចេញ​រថយន្ត​ពន្លត់​អគ្គិភ័យ​របស់​ស្នងការដ្ឋាន​នគរបាល​ខេត្ត​ព្រះ​សីហ​នុ​ចំនួន​០៣​គ្រឿង​បាន​ប្រើប្រាស់​ទឹក​អស់ ០២ ឡាន ស្មើរ ១៦ ម៉ែត្រគូប ​។ ​រថយន្ត​ពន្លត់​អគ្គិភ័យ​កងរាជអាវុធហត្ថ​ក្រុង​-​ខេត្ត​ចំនួន​០១​គ្រឿង​ប្រើប្រាស់​ទឹក​អស់​០១​ឡាន​ស្មើ​៤​ម៉ែត្រគូប​។

រថយន្ត​ពន្លត់​អគ្គិភ័យ​អង្គភាព ៩១១​ចំនួន​០១​គ្រឿង​ប្រើប្រាស់​ទឹក​អស់​០៣​ឡាន​ស្មើ​០៦​ម៉ែត្រគូប​។
ក្នុង​ករណី​អគ្គី​ភ័យ​នេះ​ផង​ដែរ​ ​មិន​បង្ក​​ឲ្យ​មនុស្ស​ណា​ម្នាក់​រង​របួស ​ឬ​បាត់បង់​ជីវិត​ឡើយ​ ៕

ខេត្តបន្ទាយ​មាន​ជ័យ​ ៖​ ប្រជាពលរដ្ឋ​កម្ពុជា​ដែល​ចូល​ពី​ប្រទេស​ថៃ​មក​កម្ពុជា​តាម​ច្រក​ទ្វារ​អន្តរជាតិ​ប៉ោយ​ប៉ែ​ត​រយៈ​២​ថ្ងៃ​ជិត​៤​ពាន់​នាក់​ក្នុង​នោះ​ពលករ​ជាង​២​ពាន់​នាក់​រហូត​ដល់​ថ្ងៃ​ទី​០២ ខែមេសា ឆ្នាំ​២០២៥​ក្រុង​ប៉ោយ​ប៉ែ​ត​។

លោក វ៉ា​ន់ ដា​រ៉ា​ន់ ប្រធាន​ស្នាក់​ការ​ច្រក​ទ្វារ​អន្តរជាតិ​ប៉ោយ​ប៉ែ​ត​បាន​ប្រាប់​ថា​៖​រយៈពេល​២​ថ្ងៃនេះ​មាន​ប្រពល​រដ្ឋ​ខ្មែរ​ដែល​ត្រឡប់​ពី​ប្រទេស​ថៃ​ចូល​មក​កម្ពុជា​វិញ​ក្នុង​ឱកាស​បុណ្យចូលឆ្នាំ​ថ្មី​ប្រពៃណី​ខ្មែរ​មាន​ចំនួន​៣.៨២៤​នាក់​ ស្រី​១.៨១៩​នាក់​ ក្នុង​នោះ​មាន​ពលករ​ចំនួន​២.៣៤០​នាក់​ស្រី​១.០៥៦​នាក់​។

លោក​បាន​បញ្ជាក់​ថា​ ​ក្រោយ​រាជរដ្ឋាភិបាល​ថៃ​បាន​ឯកភាព​តាម​សំណើរ​របស់​ក្រសួង​ការងារ​ថៃ​លើកលែង​តម្លៃ​សេវា​ការ​អនុញ្ញាត​ចេញ​.​ចូល​ប្រទេស​ថៃ​ដល់​ពលករ​ខ្មែរ​អំឡុង​ពេល​បុណ្យចូលឆ្នាំ​ថ្មី​ប្រពៃណី​យ៍​ជាតិ​ចាប់ពី​ថ្ងៃ​ទី​០១ ខែមេសា ឆ្នាំ​២០២៥​ដល់​ថ្ងៃ​ទី​១៥ ខែឧសភា ឆ្នាំ​២០២៥ ការ​លើកលែង​តម្លៃ​សេវា​នេះ​គឺ​ផ្តល់​ចូ​ន​តែ​មួយ​ដង់គត់​ដល់​ពលករ​ខ្មែរ​ដែល​មាន​លិខិតឆ្លងដែន លិខិត​ធ្វើ​ដំណើរ​ពលករ​កម្ពុជា​ទៅ​ធ្វើការ​នៅ​បរទេស​(TD)​និង​មាន​ទិដ្ឋាការ​ការងារ​ដែល​មាន​សុពលភាព​លើស​ពី​ថ្ងៃ​ទី​១៥ ខែឧសភា ឆ្នាំ​២០២៥​ការ​លើកលែង​នេះ​ក៍​បូល​រួម​ទាំង​កូន​ក្រោម​អាយុ​១៨​ឆ្នាំ​ដែល​ទទួល​បាន​វាយ​ត្រា​ប្រភេទ​ក្នុង​បន្ទុក​និង​មាន​លិខិតអនុញ្ញាត​អោយ​ស្នាក់​នៅ​ក្នុង​ប្រទេស​ថៃ​លើស​ថ្ងៃ​ទី​១៥ ខែឧសភា ឆ្នាំ​២០២៥​។

លោក វ៉ា​ន់ ដា​រ៉ា​ន់ បាន​បញ្ជាក់​ថា​៖​ពលករ​ខ្មែរ​ដែល​ត្រឡប់​ពី​ប្រទេស​ថៃ​ចូល​មក​កម្ពុជា​តាម​ច្រក​ទ្វារ​អន្តរជាតិ​ប៉ោយ​ប៉ែ​ត​ខេត្តបន្ទាយមានជ័យ ត្រូវ​បាន​ក្រុមការងារ​ស្នាក់​ការ​ត្រួតពិនិត្យ​ច្រក​ទ្វារ​អន្តរជាតិ​ប៉ោយ​ប៉ែ​ត​បាន​ធ្វើការ​សម្របសម្រួល​ដល់​ពលករ​ខ្មែរ​អោយ​បាន​លឿន​និង​ឆាប់រហ័ស​ហើយ​មាន​អាហារ​សម្រុន​សម្រាប់​ចែក​ជូន​ដល់​ពលករ​ម្នាក់​ទទួល​បាន​ក្រ​ម៉ា​១ នំប៉័ង​១ និង​ទឹក​សុទ្ធ​១​ដប​៕

រាជធានី​ភ្នំពេញ ​៖ សម្តេច​បវរ​ធិ​បតី ហ៊ុន ម៉ា​ណែ​ត ​នាយក​រដ្ឋមន្ត្រី​កម្ពុជា​ បាន​អំពាវនាវ​ពលរដ្ឋ​គ្រប់​រូប ចូលរួម​គាំទ្រ និង​ទិញ​ផលិតផល​ខ្មែរ​យក​ទៅ​ប្រើប្រាស់ ប្រកបដោយ​ស្មារតី​ជាតិនិយម ។

ការ​អំពាវនាវ​ក្នុង​ឱកាស​អបអរសាទរ ទិវា​ជាតិ​លើកកម្ពស់​ការ​ប្រើប្រាស់​ផលិតផល​ខ្មែរ ៩​មេ​សា លើក​ទី​៨ ឆ្នាំ​២០២៥ សម្តេច​ធិ​បតី ហ៊ុន ម៉ា​ណែ​ត នាយក​មន្ត្រី​នៃ​កម្ពុជា និង​ជា​ប្រធានកិត្តិយស​គណៈកម្មាធិការ​ជាតិ ជំរុញ​ចលនា​ភូមិ​មួយ​ផលិតផល​មួយ បាន​អំពាវនាវ​ដល់​បងប្អូន​ប្រជាពលរដ្ឋ​គ្រប់​រូប ឱ្យ​ចូលរួម​គាំទ្រ និង​ទិញ​ផលិតផល​ខ្មែរ យក​ទៅ​ប្រើប្រាស់ ប្រកបដោយ​ស្មារតី​ជាតិនិយម និង​បណ្តុះ​មនសិការ «​ខ្មែរ​ស្រឡាញ់​ខ្មែរ ខ្មែរ​ប្រើប្រាស់ ផលិតផល​ខ្មែរ ជា​មោទនភាព​ជាតិខ្មែរ​» ។

តាម​រយៈ​សារលិខិតរបស់​សម្តេច​បវរ​ធិ​បតី ហ៊ុន ម៉ា​ណែ​ត នាយក​រដ្ឋមន្ត្រី កាលពី​ថ្ងៃ​ទី​២០ កុម្ភៈ ដែល​ផ្សព្វផ្សាយ​លើបណ្តាញ​សង្គមរបស់​សម្តេច នា​ថ្ងៃ​ទី​២ មេ​សាបាន​លើ​ក​ឡើ​ង​ថា កម្ពុជា បាន​និង​កំពុង​ធ្វើ​ពិពិធ​កម្ម​សេដ្ឋកិច្ច និង​ធ្វើ​ទំនើប​កម្ម​លើ​គ្រប់​វិស័យ តាម​រយៈ​ការ​ដាក់​ចេញ​នូវ​កម្មវិធីនយោបាយ​សំខាន់​ៗ ជា​ពិសេស​ការ​ជំរុញ​ផលិតកម្ម​គ្រប់​ប្រភេទ ឱ្យ​មាន​លក្ខណៈ​សេដ្ឋកិច្ច​មាត្រដ្ឋាន ការ​ដាក់បញ្ចូល​បច្ចេកវិទ្យា​ឌី​ជី​ថ​ល ​ទៅ​ក្នុង​ខ្សែ​ច្រវាក់​ផលិតកម្ម និង​ការ​លើកកម្ពស់​នូវ​យន្តការ​ពាក់ព័ន្ធ​ទាំងឡាយ សំដៅ​ជួយ ធ្វើ​ឱ្យ​មាន​ប្រសិទ្ធភាព​ថ្លៃដើម មានគុណ​ភាព សោភណភាព​កាន់តែ​ល្អ​ប្រសើរ និង​មាន​សក្តានុពល​ទីផ្សារ សម្រាប់​ផលិតផល​ក្នុងស្រុក​គ្រប់​ប្រភេទ ​។

ឈរ​លើ​ស្មារតី​នេះ រាជរដ្ឋាភិបាល បាន​ដាក់​ចេញ​ នូវគោលនយោបាយ​ជាតិ ស្តី​ពី​ការ​ជំរុញ​ចលនា​ភូមិ​មួយ ​ផលិតផល​មួយ ដើម្បី​ជំរុញ​កិច្ច​អភិវឌ្ឍ​មូលដ្ឋាន តាម​រយៈ​ការ​លើកទឹកចិត្ត ប្រជាជន​ឱ្យ​ចូលរួម​ផលិត​ នូវ​វត្ថុធាតុដើម កែ​ច្នៃ និង​អភិវឌ្ឍ​ផលិតផល ធ្វើ​ឱ្យ​ប្រជាជន​មាន​មោទនភាព និង​ទទួលបាន​កិត្តិយស កិត្តិនាម​ពី​ផលិតផល​ ដែល​ខ្លួន​បាន​ផលិត ​។

ក្នុង​នោះ ​សម្តេច​បវរ​ធិ​បតី កត់​សម្គាល់ថា ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ ការ​ជំរុញ​ចលនា​ភូមិ​មួយ ​ផលិតផល​មួយ សម្រេចបាន​លទ្ធផល​យ៉ាង​ល្អ​ប្រសើរ ដែល​នាំ​ទៅ​ដល់​ការ​ប្រែប្រួល​ជា​វិជ្ជមាន ​នៃ​ផលិតផល​ខ្មែរ ដូច​ជា គុណភាព ស្តង់ដា អនាម័យ ការ​វេច​ខ្ចប់ ជា​ពិសេស​ការ​ដាក់​ស្លាក​សញ្ញា​សម្គាល់​លើ​ផលិតផល ជា​ផលិតផល​ភូមិ​មួយ​ផលិតផល​មួយ និង​ឈាន​ទៅ​ដាក់​ចំណាត់ថ្នាក់​ផលិតផល ដើម្បី​ជួយ​ជំរុញ និង​លើកទឹកចិត្ត​ផលិតករ​ឆ្នើម ដែល​បាន​ខិតខំ​កែ​ច្នៃ ផលិតផល​ប្រកបដោយ​គុណភាព​ខ្ពស់ សម្រាប់​ទីផ្សារ​ក្នុងស្រុក និង​ក្រៅប្រទេស ​។

ក្នុង​គោលបំណង​លើកកម្ពស់ ការ​ប្រើប្រាស់​ផលិតផល​ខ្មែរ​ឱ្យ​កាន់តែ​ទូលំទូលាយ និង​ផុលផុស រាជរដ្ឋាភិបាល​បាន​ប្រគល់​ភារកិច្ច​ជូន​គណៈ ក​ម្មា​ធិ​ការ​ជាតិ​ជំរុញ​ចលនា​ភូមិ​មួយ​ផលិតផល​មួយ រៀបចំ​ទិវា​ជាតិ​លើកកម្ពស់​ការ​ប្រើប្រាស់​ផលិតផល​ខ្មែរ ៩​មេ​សា ជា​រៀង​រាល់​ឆ្នាំ ដែល​ឆ្នាំ​២០២៥ នេះ គឺជា​ទិវា​ជាតិ លើកកម្ពស់​ការ​ប្រើប្រាស់​ផលិតផល​ខ្មែរ លើក​ទី​៨ ក្រោម​ប្រធានបទ «​ប្រើប្រាស់​ផលិតផល​ខ្មែរ គឺ​មោទនភាព​ជាតិខ្មែរ​»​ ។

សម្តេច​បវរ​ធិ​បតី ហ៊ុន ម៉ា​ណែ​ត ថ្លែង​ថា “​ខ្ញុំ​សូម​អំពាវនាវ​ដល់​បងប្អូន​ប្រជាពលរដ្ឋ​គ្រប់​រូប សូម​ចូលរួម​គាំទ្រ និង​ទិញ​ផលិតផល​ខ្មែរ យក​ទៅ​ប្រើប្រាស់ ប្រកបដោយ​ស្មារតី​ជាតិនិយម និង​បណ្តុះ​មនសិការ «​ខ្មែរ​ស្រឡាញ់​ខ្មែរ ខ្មែរ​ប្រើប្រាស់ ផលិតផល​ខ្មែរ ជា​មោទនភាព​ជាតិខ្មែរ​» ដើម្បី​រួមចំណែក​ធ្វើ​ឱ្យ​ផលិតកម្ម​ក្នុងស្រុក​បន្ត​អត្ថិភាព សំដៅ​លើកកម្ពស់​កិត្យានុភាព​ជាតិ និង​ភាព​ម្ចាស់​ការ​។ «​បើ​យើង​ជា​ខ្មែរ មិន​គាំទ្រ​ផលិតផល​ខ្មែរ តើ​ឱ្យ​អ្នក​ណា​មក​គាំទ្រ​ផលិតផល ខ្មែរ​!» ​។

ជាមួយ​គ្នា​នេះ សម្តេច​បវរ​ធិ​បតី ឱ្យ​ក្រសួង ស្ថាប័ន​ពាក់ព័ន្ធ​ទាំងអស់ ថ្នាក់​ជាតិ និង​ថ្នាក់​ក្រោម​ជាតិ ក៏​ដូច​ជា​ដៃគូ​អភិវឌ្ឍ អង្គការ​មិនមែន រដ្ឋាភិបាល​ជាតិ អន្តរជាតិ វិស័យ​ឯកជន បន្ត​កិច្ចសហការ ជាមួយ​គណៈកម្មាធិការ​ជាតិ​ជំរុញ​ចលនា​ភូមិ​មួយ ផលិតផល​មួយ ដើម្បី​ជួយ​ពង្រឹង​ផលិតករ​ខ្មែរ ឱ្យ​អភិវឌ្ឍ​ផលិតផល​របស់​ខ្លួន​ឱ្យ​កាន់តែ​មានគុណ​ភាព​ខ្ពស់ សម្បូរ​បែប កាន់តែ​មាន​ទំនុកចិត្ត​ពី​អ្នក​ប្រើប្រាស់ និង​មាន​សក្តានុពល​ពាណិជ្ជកម្ម ទាំង​លើ​ទីផ្សារ​ជាតិ​និង​អន្តរជាតិ​ ៕

ទី​ក្រុង​សេអ៊ូល៖ ភ្លើង​ឆេះ​ព្រៃ​​នៅ​កូរ៉េ​ខាង​ត្បូង​បន្ត​រាត​ត្បាត​យ៉ាង​ខ្លាំង​ក្លា​ដល់​ដំណាក់​កាល​គ្រប់​គ្រង​លែង​បាន​​ទៅ​ហើយ​នៅ​ពេល​ត្រឹម​តែ​មួយ​ថ្ងៃ​ទំហំ​នៃ​ការ​ឆេះ​បាន​កើន​ឡើង​ទ្វេ​មួយ​ជា​ពីរ​បើ​ប្រៀប​ធៀប​រវាង​​​ម្សិលមិញ និង​ថ្ងៃ​នេះ​។ នេះ​បើ​យោង​តាម​ការ​បង្ហើប​ឱ្យ​ដឹង​ពីអាជ្ញា​ធរ​មូល​ដ្ឋាន​។ ចំនួន​អ្នក​ស្លាប់​ដោយ​សារហេតុ​ការណ៍​នេះ​បាន​​កើន​ឡើង​ដល់​២៧​នាក់ខណៈ​ដែល​​មនុស្ស​៣០​នាក់​ទៀត​រង​របួស​។ នេះ​បើ​យោ​ងតាម​ការ​ផ្សាយ​របស់​ទី​ភ្នាក់​ងារ​ព័ត៌​មាន​យុ​ន​ហាប់​។

​អាជ្ញា​ធរ​​​ចាត់​ទុក​ថា​នេះ​ជា​ភ្លើង​ឆេះ​ព្រៃ​ដ៏​ធំ​បំផុត​នៅ​ក្នុង​ប្រវត្តិ​សាស្ត្រ​កូរ៉េ​សម័យ​ទំនើប​។ ត្រឹម​តែ​ប្រាំ ឬ​ប្រាំ​មួយ​ថ្ងៃ​ប៉ុណ្ណោះ​ភ្លើង​បាន​លេប​ត្របាក់​ព្រៃឈើ​ជាង​៣៥០០០​ហិចតារ​។ ប្រធានា​ធិប​តី​ស្ដី​ទី​​កូរ៉េ​ខាងត្បូង លោក​ហាន​ដុក​ស៊ូ ថ្លែង​ថា​យើង​កំពុង​ស្ថិត​នៅ​ក្នុង​ស្ថាន​ភាព​អាសន្ន​ទូទាំង​ប្រទេស​ដោយ​សារ​ភ្លើង​ឆេះ​ព្រៃ​ដែល​រីក​រាល​ដាល​ហួស​ពី​ការ​ស្មាន​របស់​យើង​។​

ការិយាល័យ​ជាតិ​​គ្រប់​គ្រង​គ្រោះ​មហន្ត​រាយ​ថ្លែង​ថា​អគារ​ និង​ផ្ទះ​របស់​អ្នក​ស្រុក​សរុប​៣២៥​ខ្នង​ត្រូវ​បាន​បំផ្លាញ​អស់​គ្មាន​សល់​ ខណៈ​ដែល​មនុស្ស​ជាង​៣​៧០០០​នាក់​ត្រូវ​តែ​បង្ខំ​ចិត្ត​រត់​ចោល​ផ្ទះ​សម្បែង និង​ស្នាក់​នៅ​តាម​ទី​ជម្រក​បណ្ដោះ​អាសន្ន​។ ប្រឈម​នឹង​បញ្ហា​នេះ អាជ្ញា​ធរ​កំពុង​ប្រើ​ប្រាស់​វិធាន​ការ​សរុប​ដើម្បី​ចាត់​ការ​ភ្លើង​ឆេះ​ព្រៃ​ដោយ​ប្រើ​ប្រាស់​កម្លាំង​មនុស្ស​ជាង​៩​ពាន់​នាក់​, ​​ឡាន​ទឹក​ជា​ច្រើន​គ្រឿង និង​​​ឧទ្ធម្ភាគ​ចក្រ​១២០​គ្រឿង​ដើម្បី​ទម្លាក់​ទឹក​ពី​លើ​អាកាស​។

យោធា​កូរ៉េ​ខាង​ត្បូង​បាន​បញ្ចេញ​ប្រេង​ឥន្ធនៈ​ពី​ក្នុង​ស្តុក​ដើម្បី​ផ្គត់​ផ្គង់​តម្រូវ​ការ​របស់​ឧទ្ធម្ភាគ​ចក្រ​ដែល​ត្រូវ​បំពេញ​ការ​ងារ​នៅ​តំបន់​ដាច់​ស្រយាល​ ឬ​តំបន់​ភ្នំ​ដែល​ឡាន​ទឹក​ពិបាក​ធ្វើ​ដំណើរ​ទៅ​ដល់​។ ​​តំបន់​ឆឹង​សុង​កំពុង​រង​គ្រោះខ្លាំង​ដោយ​សារ​ភ្លើង​ឆេះ​ព្រៃ​លើក​នេះ​។ គេ​ឃើញ​តែ​ផ្សែងដ៏​ខ្មៅ​ងងឹត​គ្រប​ដណ្ដប់​ជុំ​ជិត​ពី​លើ​​ភ្នំ​ជូ​វ៉ាង (Juwang)​ និង​ឃើញ​​​ឧទ្ធម្ភាគ​ចក្រ​ដឹក​ជញ្ជូន​ទឹក​​ស្រោច​ពី​លើ​ភ្នំ​នេះ​​ជា​បន្ត​បន្ទាប់​​។

ឥឡូវ​នេះ ភ្លើង​ឆេះ​ព្រៃ​កំពុង​គំរាម​កំហែង​តំបន់​បេតិក​ភ័ណ្ឌ​ជាតិ​សំខាន់​ៗ​។ ​​រូប​បដិមា​ព្រះ​ពុទ្ធ​ជា​ច្រើន​អង្គ​ត្រូវ​អាជ្ញាធរ​លើក​ចេញ​ពី​កន្លែង​គ្រោះ​ថ្នាក់​នៅ​តំបន់​ភាគ​អាគ្នេយ៍​។ គេ​បាន​ប្រើ​ប្រាស់​កម្លាំង​មនុស្ស​៧៥០​នាក់​ដើម្បី​ការ​ពារ​តំបន់​បេតិក​ភ័ណ្ឌ​។ តំបន់​បេតិ​កភ័ណ្ឌ​យ៉ាង​តិច​១៨​កន្លែង​ រួម​ទាំង​វត្ត​អារាម​បុរាណ​គូន​សា (Gounsa) នៅ​តំបន់​អ៊ូយ​សឹង​ (Uiseong) ត្រូវ​ភ្លើងអគ្គិ​ភ័យ​​ដុត​បំផ្លាញ​សឹង​តែ​ក្លាយ​ជា​ផេះ​។

ពាក់​ព័ន្ធ​នឹង​ដើម​ហេតុ​នៃ​ភ្លើង​ឆេះ​ព្រៃ​នេះ អាជ្ញា​សង្ស័យ​ថា​នេះ​ជា​ស្នា​ដៃ​របស់​មនុស្សច្រើន​ជាង​កត្តា​ធម្ម​ជាតិ​។ នេះ​ជា​រដូវ​ដែល​មនុស្ស​ត្រូវ​ការ​​សម្អាត​ផ្នូរ​ដូន​តា​ និង​ឪ​ពុក​ម្ដាយ​របស់​ខ្លួន។​​ ដូច្នេះ ពួក​គេ​អាច​នឹង​ជម្រះ​ស្មៅ​ ឬ​រុក្ខ​ជាតិ​ងាប់​ៗ​ដើម្បី​ដុត​​ចោល​។ ឬ​មិន​ដូច្នេះទេ​ ភ្លើង​នេះ​អាច​នឹង​បង្ក​ឡើង​ដោយ​មនុស្ស​ផ្សារ​ដែក​នៅ​ក្នុង​ព្រៃ​។ រដ្ឋ​បាល​ព្រៃ​ឈើ​រំពឹង​ថា​នឹង​មាន​ភ្លៀង​ធ្លាក់​នៅយប់​នេះ​នៅ​លើ​ទីតាំង​ដែល​មាន​ភ្លើង​ឆេះ​ព្រៃ​។ ប៉ុន្តែ​នេះ​គ្រាន់​តែ​ជា​ភ្លៀង​កក់​ខែ​បន្តិច​បន្តួច​តែ​ប៉ុណ្ណោះ។​​ ដូច្នេះ​មិន​អាច​ធ្វើ​ឱ្យ​​រលត់​ភ្លើង​ឆេះ​ព្រៃ​នេះ​ទាំង​ស្រុង​បាន​ឡើយ​។ ខាង​លើ​នេះ​ជា​ការ​ដកស្រង់​ពី​គេហ​ទំព័រ​ឌី​ដាប់បល​​យូ (DW)​៕​

ទី​ក្រុង​វ៉ាស៊ីនតោន៖​ ​លោ​ក​ត្រាំ​ផ្ទុះ​កំហឹង​យ៉ាង​ខ្លាំង​ចំពោះ​លោក​ម៉ាយ​វ៉ល (Mike Waltz) ដែល​ជា​ទី​ប្រឹក្សា​សន្តិ​សុខ​ជាតិ​ និង​ដែល​បាន​ធ្វើ​ឱ្យ​បែក​ធ្លាយ​ព័ត៌​មាន​សម្ងាត់​ពាក់​ព័ន្ធ​នឹង​ផែន​ការ​របស់​អាមេរិក​វាយ​ប្រហារ​ទៅ​លើ​មូល​ដ្ឋាន​របស់​ក្រុម​ហ៊ូទី​នៅ​ប្រទេស​យេ​ម៉ែន​។ កំហឹង​ក្រេវ​ក្រោធ​នេះ​កើត​ឡើង​បន្ទាប់​ពី​ព័ត៌​មាន​សម្ងាត់​ត្រូវ​បែក​ធ្លាយ​ទៅ​ដល់​ដៃ​​របស់​និពន្ធ​នាយក​គេហ​ទំព័រ​ដឹ​អេន​​លេន​ធីក (The Atlantic)។

ប្រភព​ខ្លះ​ថា​តាម​ពិត​មន្ត្រីរដ្ឋាភិបាល​អាមេរិក​បង្ហោះ​ឯក​សារ​សម្ងាត់​នោះ​នៅ​ក្នុង​ប្រព័ន្ធ​ស៊ីក​ណល (Signal) ​ដែល​ជា​ក្រុម​សន្ទនា​​សម្ងាត់​។ ប៉ុន្តែ​ចៃ​ដន្យ​អ្វី​នៅ​អំឡុង​ពេល​នៃ​ការ​បង្ហោះ​ឯក​សារ​សម្ងាត់​នោះ លោក​ម៉ាយ​វ៉ល​មាន​លេខ​ទូរ​ស័ព្ទ​របស់​និពន្ធ​នាយក​ លោក​ចែហ្វ​ហ្វ្រ៊ី ហ្គោល​បឺក (Jeffrey Goldberg)។ លោក​វ៉ល​ក៏​ទាញ​ឈ្មោះ​របស់​លោក​ហ្គោល​បឺក​ទៅ​ក្នុង​គ្រុប​សម្ងាត់​នោះ​ដែរ​។

តាម​ពិត​ត្រាំ​ក្ដៅ​ក្រហាយ​រឿង​ធ្វើ​ឱ្យ​ការណ៍​សម្ងាត់​នេះ​ល្មម​ទេ​។ ប៉ុន្តែ​អ្វី​ដែល​ធ្វើ​ឱ្យ​លោក​ខឹង​ដាច់​ក្បាល​​ដាច់​កន្ទុយ​នោះ​នៅ​ត្រង់​ថា​ទី​ប្រឹក្សា​សន្តិ​សុខ​ជាតិ​រូប​នេះ​មាន​លេខ​ទូរ​ស័ព្ទ​របស់​និពន្ធ​នាយក​ហ្គោល​បឺក​។ លោក​ត្រាំ​ក្នុង​នាម​ជា​ប្រធានា​ធិបតី និង​ក៏​​ជា​អគ្គ​បញ្ជា​ការ​កង​ទ័ព​ផង​ដែរ​នោះ​កំពុង​ដេក​ឆ្ងល់​ និង​មាន​មន្ទិល​សង្ស័យ​មិន​ចេះអស់​មិន​ចេះ​ហើយ​ថា​ហេតុអ្វី​បានជា​​ទី​ប្រឹក្សា​រូប​នេះ​មាន​លេខ​ទូរ​ស័ព្ទ​រក្សា​ទុក​នៅ​ក្នុង​ទូរ​ស័ព្ទ​ដៃ​របស់​គាត់​មិន​ដឹង​តាំង​ពី​អង្កាល់​។​ លោក​ត្រាំ​ជេរ​ប្រទេច​​ផ្ដាសា​ដាក់​លោក​​វ៉ល​ថា​ជា​មនុស្ស​ចោល​ម្សៀត​។​

កាល​ពី​យប់​មិញ លោ​កវ៉ល​ប្រាប់​ទូរ​ទស្សន៍​ហ្វក់​ថា​លោក​សូម​ទទួល​ខុស​ត្រូវ​ទាំង​ស្រុង​ចំពោះ​ការ​បែក​ធ្លាយ​ការណ៍​សម្ងាត់​នោះ​។​ លោក​ថា​លោក​ជា​អ្នក​បង្កើត​ក្រុម​សន្ទនា​សម្ងាត់​​។ ការ​ភ្លាត់​ស្នៀត​លើក​នេះ​ជា​កំហុស​ដ៏​អាម៉ាស់​សម្រាប់​រូប​លោក​។ ប៉ុន្តែ​លោក​វ៉ល​ក៏​ព្យាយាម​និយាយ​វាយ​បក​ទៅ​អ្នក​កាសែត​រូប​នោះ​វិញ​ដែរ​។ លោក​និយាយ​ដោយ​ប្រយោល​ថា​នៅ​ទី​ក្រុង​នេះ (វ៉ាស៊ីនតោន) មាន​អ្នក​កាសែត​ច្រើន​ណាស់​ដែល​ប្រើ​ភាសា​ភូត​កុហក​ដើម្បី​បាន​ល្បី​ឈ្មោះ​។

ឧទាហរណ៍ ដូច​ជា​អ្នក​កាសែត​ម្នាក់​នេះ​ជា​ដើម (ចែហ្វ​ហ្វ្រ៊ី​ ហ្គោល​បឺក) លោក​ពុំ​ដែល​ជួប​មុខ​ ពុំ​ដែល​ស្គាល់​ ពុំ​ដែល​និយាយ​រក​គ្នា​ទាល់​តែ​សោះ​។ លោក​ថា​យើង​កំពុង​ស្រាវ​ជ្រាវ​ដើម្បី​ចង់​ដឹង​ថា​តើ​បុគ្គល​រូប​នេះ​អាច​ចូល​ទៅ​ក្នុង​ក្រុម​សម្ងាត់​នេះ​ដោយ​របៀប​ណា​។ តាម​មើល​ទៅ​ លោ​កវ៉ល​ខ្លួន​ឯង​ជា​អ្នក​ទាញ​ចែហ្វ​ហ្វ្រ៊ី​ ហ្គោល​បឺក​ចូល​ទៅ​ក្នុង​គ្រុប​សម្ងាត់​នោះ។ គ្រុប​នេះ​​មាន​មន្ត្រី​ជាន់​ខ្ពស់​របស់​រដ្ឋាភិបាល​អាមេរិក​តែ​១៨​នាក់​ប៉ុណ្ណោះ​ជា​សមាជិក​។ ពួក​គេ​ពិភាក្សា​គ្នា​អំពី​ផែន​ការ​ធ្វើ​សង្គ្រាម​ប្រឆាំង​នឹង​ក្រុម​ហ៊ូទី​។

អាមេរិក​ចាប់​ផ្ដើម​បើក​​ប្រតិ​បត្តិ​សឹក​នេះ​​នៅ​ថ្ងៃ​ទី​១៥ ខែ​មីនា​ ឆ្នាំ​២០២៥​។ លោ​កចែហ្វ​ហ្វ្រ៊ី​សម្រេច​ថា​មិន​ផ្សព្វ​ផ្សាយ​ផែន​ការ​សម្ងាត់​នេះ​ជា​សា​ធារណៈ​ទេ​។ ប៉ុន្តែ​​កាល​ពី​ថ្ងៃ​ចន្ទ គាត់​បាន​បង្ហាញ​សារ​ខ្លះ​ៗ​​ដែល​លាត​ត្រដាង​ការ​រិះ​គន់​មាក់​ងាយ​ពី​សំណាក់​មន្ត្រី​រដ្ឋាភិបាល​អាមេរិក​ចំពោះ​ពួក​​អឺរ៉ុប​។ ក្នុង​នោះ គេ​ឃើញ​សារ​របស់​រដ្ឋ​មន្ត្រីការ​ពារ​ជាតិ​អាមេរិក​សរ​សេរ​ថា​​លោក​សូម​ចែក​រំលែក​ការ​ស្អប់​ខ្ពើម​ចំពោះ​គំនិត​កេង​ប្រវ័ញ្ច​​របស់​ពួក​អឺរ៉ុប​ផង​។ គួរ​ឱ្យ​អាណិត​ណាស់​៕​​

រាជធានី​ភ្នំពេញ ​៖ ឯកឧត្តម ឃួ​ង ស្រេង អភិបាល​រាជធានី​ភ្នំពេញ និង​លោក​ជំទាវ បាន​ផ្ញើ​សារ​ចូលរួម​រំលែក​ទុក្ខ​យ៉ាង​ក្រៀមក្រំ​បំផុត​ចំពោះ​មរណភាព​របស់ ឯកឧត្តម អ្នកឧកញ៉ា ឧត្តម​មេត្រី​វិសិដ្ឋ ហ៊ុន សាន បងប្រុស​ច្បង​របស់ សម្តេច​តេ​ជោ ហ៊ុន សែន ដែល​បាន​ទទួលអនិច្ចកម្ម នា​ម៉ោង ​២ៈ២៧​នាទី​ព្រឹក​ថ្ងៃ​ទី​ ២៨ ខែមីនា ឆ្នាំ ​២០២៥ ក្នុង​ជន្មាយុ ​៧៨ ​ឆ្នាំ ដោយ​រោគាពាធ ​។

យើងខ្ញុំ​ពិតជា​មាន​សេចក្តី​តក់ស្លុត និង​សោកស្តាយ​យ៉ាង​ខ្លាំង​បំផុត​ចំពោះ​មរណភាព​របស់ ឯកឧត្តម អ្នកឧកញ៉ា ឧត្តម​មេត្រី​វិសិដ្ឋ ដែល​នេះ​គឺជា​ការ​បាត់បង់​នូវ​ឧត្ដម​ស្វាមី បិតា បិតាក្មេក និង​ជីតា ប្រកបដោយ​ព្រហ្ម​វិហារធម៌ មាន​គុណូបការៈ​ដ៏​ជ្រាលជ្រៅ​និង​ជាទី​គោរព ស្រឡាញ់​ដ៏​ខ្ពង់ខ្ពស់​បំផុត​របស់​កូន​ៗ ចៅ​ៗ ដែល​កន្លង​មក អ្នកឧកញ៉ា ឧត្តម​មេត្រី​វិសិដ្ឋ បាន​ខិតខំ​ប្រឹងប្រែង​យក​អស់កម្លាំង​កាយ កម្លាំងចិត្ត ប្រាជ្ញា​ស្មារតី តស៊ូ ពុះពារ​ចិញ្ចឹម​បីបាច់​ថែរក្សា ផ្គត់ផ្គង់ ទំនុកបម្រុង​សព្វបែបសព្វយ៉ាង​ដល់​ក្រុម​គ្រួសារ ព្រមទាំង​ផ្ដល់​នូវ​ឱវាទ​អប់រំ​ទូន្មាន ភាព​កក់ក្ដៅ និង​សេចក្ដី​ស្រលាញ់​ដ៏​ធំធេង​មិន​អាច​កាត់ថ្លៃ​បាន​ដល់​កូន​ៗ ចៅ​ៗ​ឱ្យ​បាន​ក្លាយជា​បញ្ញវន្ត​ដ៏​ប្រពៃ ជា​ពលរដ្ឋ​ដ៏​ល្អ​។ លើស​ពី​នេះ​ទៅ​ទៀត មរណភាព​របស់ ឯកឧត្តម អ្នកឧកញ៉ា ឧត្តម​មេត្រី​វិសិដ្ឋ ហ៊ុន សាន ក៏​ជា​ការ​បាត់បង់​ដ៏​ធំធេង​ឥស្សរជន​ឆ្នើម​មួយ​រូប ដែល​បាន​ខិតខំ​បំពេញការងារ និង​សម្រេច​បាន​លទ្ធផល​ជា​ច្រើន​ជូន​ជាតិ​មាតុភូមិ​ ។

ក្នុង​ឱកាស​ប្រកបដោយ​សមាន​ទុក្ខ​ដ៏​ក្រៀមក្រំ​នេះ យើងខ្ញុំ​ទាំងអស់​គ្នា សូម​ចូលរួម​រំលែក​នូវ​មរណទុក្ខ​ជាមួយ​លោក​ជំទាវ ព្រមទាំង​ក្រុម​គ្រួសារ ដោយ​សេចក្តី​សង្វេគ​ជាទី​បំផុត និង​សូម​ឧទ្ទិស​បួងសួង សូម​ឱ្យ​វិញ្ញាណក្ខន្ធ​របស់ ឯកឧត្តម អ្នកឧកញ៉ា ឧត្តម​មេត្រី​វិសិដ្ឋ ហ៊ុន សាន បាន​សោយសុខ​ក្នុង​សុគតិភព កុំបី​ឃ្លៀងឃ្លាត​ឡើយ​ ៕ អត្ថបទសហការ